16. raz wokoło hata běhali

srjeda, 21. apryla 2021
artikl hódnoćić
(0 )
Tež jutrowny zajac bě w Němskich Pazlicach lětsa zaso mjez sportowčemi a sportowcami.  Foto: Norbert Adler Tež jutrowny zajac bě w Němskich Pazlicach lětsa zaso mjez sportowčemi a sportowcami. Foto: Norbert Adler

Wšitke tradicionalne ludosportowe po­dawki w Němskich Pazlicach dyrbja lětsa kaž hižo loni poprawom do wody padnyć. Kreatiwni čłonojo towarstwa Natwar Němske Pazlicy pak wumyslichu sej znowa wulkotnu alternatiwu. Tak móžeše kóždy sportowc, kiž bě jutrowne dny a po tym jedne koło wokoło wulkeho hata po puću, wšojedne hač pěši, na kolesu abo hinak, na nastajene brězy při płoće stadiona jedne jutrowne jejko powěsnyć a sej wopismo wotkołkować. W běhu dweju tydźenjow wobkruži tuž něhdźe 200 wobdźělnikow něhdźe pjeć kilometrow dołhu čaru, wězo stajnje z dosć wotstawkom k dalšim sportowčam a sportowcam. Jutrownu póndźelu rozdźěli jutrowny zajac samo słódkosće a wšěch­ akterow wosobinsce postrowi. Wosebje dźěćom běše to rjana překwapjenka.

Sportowe towarstwo Natwar Němske Pazlicy dźakuje so wšitkim wobdźělnikam a darićelam pjenjez. Nětko so nadźijeja, zo móža 21. wotběhanje husaceje pje­čenje 26. decembra bjez ćežow přewjesć.

wozjewjene w: Sport
Prošu přizjewće so, chceće-li komentar podać

Serbska debata

nowostki LND