Budyšin (SN/bn). Składnostnje stoćinow Bjarnata Nowaka, kotrež by bywši funkcionar Domowiny, intendant Němsko-Serbskeho ludoweho dźiwadła, nawoda folklorneho centruma Doma za serbsku ludowu kulturu a wučer předwčerawšim woswjećił, wotmě so wčera wopominanje w kopaće połnej Smolerjec kniharni. Handrij Nowak předstaji wažne žiwjenske mězniki swojeho nana předčitawši wurězki z dopomnjenki jubilara wopřijimaceje knihi „Štó da sym? Wer bin ich?“, kotruž je njedawno w swójskej režiji wudał. Mjez druhim rysowaše wón puć Bjarnata Nowaka wot wojaka w Druhej swětowej wójnje k raznemu zakitowarjej demokratiskeho antifašizma kaž tež k narodnemu prócowarjej. Byrnjež jemu častodosć šćěpy pod nohi mjetali, bě so čas žiwjenja za serbstwo zasadźował. W tym zwisku kritizowaše Handrij Nowak, zo so jeho nan ze stron „oficialneho aparata“ dźensa přemało česćuje, štož je po jeho słowach tež wuslědk powšitkownje pobrachowaceje wědy.