Wokrjes projekt njepodpěra
Mjeztym 40 lět w nakładnistwje skutkuje
W Budyskej Smolerjec kniharni dźensa na cyle wosebity jubilej zhladuja. Kniharnica a nawodnica Annett Šołćic mjeztym 40 lět swoje dźěło w Ludowym nakładnistwje Domowina wukonja. „W 9. lětniku je tehdyši wotrjadnik wobłuka rozšěrjenje Beno Kučank w Pančanskej šuli za powołanja w zawodźe wabił“, wona wuswětla. Po wotzamknjenju šule je so rodźena Kašečanka tuž w nakładnistwje přizjewiła, dokelž bě so doma tež stajnje z knihami zaběrała a je w polcach rjadowała. Smolerjec kniharnja tehdy scyła hišće njeeksistowaše. „Knihi předawachmy w druhich kniharnjach“, Annett Šołćic rozprawja. Tam pak njebě dosć městna, zo móhli serbske knihi w dosahacej měrje prezentować. Poskitk nakładnistwa bě wo wjele wjetši. „Na zawodnej zhromadźiznje krótko do přewróta namjetowach swójsku kniharnju zarjadować“, wona rozłoži. Tehdy politiska změna hišće wotwidźeć njebě. Wokoło lěta 1990 njeběchu kniharnje hižo z wobrotom ze serbskimi knihami spokojom. Wulki čas tuž, zo serbske nakładnistwo swójski wobchod załoži. Na Budyskej Pchalekowej bě wotwidźeć, zo tamniša galerija wućehnje.
Župa na festiwalu sobu skutkowała
Animal farm abo hotowe swinstwo
Lipsk (SN). W nakładnistwje Veles je přełožk swětoweho klasikarja Georgea Orwella „Animal farm abo hotowe swinstwo“ wušoł. Martin Holanski je knihu přełožił, nowe ilustracije su wot Choćebuskeje wuměłče Siggiko. Dosłowo je literarna wědomostnica Juliane Rehnolt napisała.
Animal farm abo hotowe swinstwo je mudra a napjata stawizna, kotraž pokazuje, kak móc ludźi (abo zwěrjata) přeměnja. Kniha na to dopomina, kak wažnej ciwilna kuraža a kritiske myslenje stej.
W Smolerjec kniharni z Prahi do Palestiny pućowali
Chłóšćenku za wuši a duch je sej wčera wječor něhdźe 40 wopytowarjow Smolerjec kniharnje lubić dało. Tam předstajištaj wudawaćel dr. Friedrich Pollack a lektor Michał Nuk njedawno w Ludowym nakładnistwje Domowina wušłu knihu „Z Prahi do Palestiny“.
Budyšin (SN/WŽ). Nowostka wobsahuje wotpowědnje swojemu podtitlej „reportaže z wichorojtych časow“ serbskeho nowinarja Jurja Wićaza (1899–1974). Po tym zo bě jednaćel LND Syman Pětr Cyž puć publikacije wot ideje hač k atraktiwnje wuhotowanej knize rysował, wzaštaj wudawaćel a lektor přitomnych sobu na wotměnjawe pućowanje po stacijach Wićazoweho nowinarskeho žiwjenja.
Tež bjez zwady dobra politiska kniha
Čehodla telko ludźi na wuchodźe Němskeje „zapad“ hidźi a kak so tež tam na „nowej muri“ twari, je wuchadźišćo knihi „Die neue Mauer“, kotrejež awtoraj so z aktualnej swětowej politiku rozestajataj.
Bodo Ramelow běše jenički ministerski prezident w Němskej, kiž njeje studował. Ilko-Sascha Kowalczuk bu wot wažneje nadregionalneje nowiny „punk mjez stawiznarjemi“ mjenowany. Knihi z dialogami hinak myslaceju wo palacych načasnych temach tworja mjeztym žanr. Móžeš jeju za wječornu lekturu sobu do łoža wzać a pluskotacu bjesadu wšědnje dale sćěhować. Dramaturgisce je nakładnistwo C.H. Beck w tutym padźe wšo prawje činiło: Ramelow, zapadnik a zastupjer strony w prawniskim naslědnistwje SED, kotrejež dotal jenički ministerski prezident wón wot 2014 hač do 2024 w Durinskej běše, a Kowalczuk, disident za čas NDR a potom mjez druhim wědomostny sobudźěłaćer zarjada za podłožki stasi a wot najnowšeho poradźowar priwatneho Muzeja NDR w Berlinje – to lubi dosć napjateje kontrowersy.
Serbska hymna w mjezysłowjanšćinje zaklinčała
W Poznanju zeńdźechu so Słowjenjo k zhromadnemu hudźenju
Mjezysłowjanski spěwny wječor wotmě so minjeny pjatk w Poznanju. Organizowała bě jón załožba „Mjezynarodny mjezysłowjanski forum“ (InterSlavic Linguistics Forum). W centrumje rjaneho pólskeho města (hdźež móžeš sej mjez druhim najstaršu katedralu Pólskeje wobhladać) zeńdźe so pisana skupina ludźi – rěčnicy a wuknjacy mjezysłowjanšćiny a dalši zajimcy z Pólskeje, Čěskeje, Běłoruskeje a Ukrainy. Wječor zahaji student Uniwersity Adama Mickiewicza w Poznanju Roberto Lombino, kotrehož snadź někotři Serbja znaja – před něšto lětami bě wón mjenujcy mjez stipendiatami Załožby za serbski lud a je jedne lěto sorabistiku w Lipsku studował. Knjez Lombino zanjese medley spěwow wot słowjanskeho Balkana hač k serbskemu šlagrej „Palenc“. Při tym sam sebje na akordeonje přewodźeše. Jeho wustupej slědowaše spěwny wječork, za kotryž běchu organizatorojo zběrku spěwow zestajeli, kiž su we wjacorych słowjanskich ludach znate.
Tež moderna hudźba na koncertach
Skupina Astronawt a Milena Wowčerjec lětsa prěni raz nazymski koncert wuhotujetej, a to sobotu, 15. nowembra w Radworju w „Meji“. Kaž projektna managerka Domowiny Kathrin Młynkowa našemu wječornikej praji, je plan lětušich nazymskich koncertow zestajany.
Budyšin (SN/WŽ). Woblubowany rjad zahaji pjatk, 26. septembra, serbski muski chór Delany w kulturnym domje w Salowje. Tomu ma hač do srjedź nowembra dźewjeć koncertow sćěhować. Mjez wuhotowacymi budźe lětsa tójšto młodych, nimo spočatnje mjenowanych na přikład Jan a Helena Brězan-Hejduškec abo Lipki – to je dorost, kiž z chórom Lipa wustupi.
