W Poznanju zeńdźechu so Słowjenjo k zhromadnemu hudźenju

Mjezysłowjanski spěwny wječor wotmě so minjeny pjatk w Poznanju. Organi­zowała bě jón załožba „Mjezynarodny mjezysłowjanski forum“ (InterSlavic ­Linguistics Forum). W centrumje rjaneho pólskeho města (hdźež móžeš sej mjez druhim najstaršu katedralu Pólskeje wobhladać) zeńdźe so pisana skupina ludźi – rěčnicy a wuknjacy mjezysłowjanšćiny a dalši zajimcy z Pólskeje, Čěskeje, Běłoruskeje a Ukrainy. Wječor zahaji student Uniwersity Adama Mickiewicza w Poznanju Roberto Lombino, kotrehož snadź někotři Serbja znaja – před něšto lětami bě wón mjenujcy mjez stipendiatami Załožby za serbski lud a je jedne lěto sorabistiku w Lipsku studował. Knjez Lombino zanjese medley spěwow wot słowjanskeho Balkana hač k serbskemu šlagrej „Palenc“. Při tym sam sebje na akordeonje přewodźeše. Jeho wustupej slědowaše spěwny wječork, za kotryž běchu organizatorojo zběrku spěwow zestajeli, kiž su we wjacorych słowjanskich ludach znate.