Posledni tydźeń přihotow wšěch wobdźělenych wužaduje

Chrósćicy (SN/MG/lmc). We wosadnicy Chróšćanskeje fary so z ludźimi mjerwi: Žony, mužojo a dźěći pytaja na dołhich žerdźach swoje kostimy. Je sobotu rano, krótko po wosmich a wšitcy su tróšku napjeći, wšako je dźensa wažny dźeń. Prěni raz zwučuja akterki a akterojo pasionskich hrow za swoju lětušu produkciju w kostimach a tak přeměnjeja so wosadni do wosobow za čas Jězusa před dwaj tysac lětami. Zo je hižo pjatk premjera, tole je dźensa mnohim prěni raz prawje wědome.