Wučomnicy ratarstwa su swoje wuswědčenje dóstali – mjez nimi tež Serbja
Biskopicy/Budyšin (SN/BŠe/CeK). Na swjatočnym přepodaću wuswědčenjow wučomnikam tak mjenowanych zelenych powołanjow je so minjeny pjatk w hosćencu na Butrowej horje w Biskopicach 28 młodostnych chětro wjeseliło. Minjene tři lěta su wuspěšnje powołanje ratarja abo hladarja zwěrjatow nawuknyli. W dualnym wukubłanju běchu sej wědu přiswojili, praksu zeznali a z wuspěchom swoje pruwowanja zabsolwowali. Regionalny zwjazk burow Budyšin-Kamjenc swjatočnosć kóžde lěto organizuje. Hóstni rěčnicy běchu lětsa krajny rada Budyskeho wokrjesa Udo Witschas (CDU), Henrik Fichtner z krajneho zarjada za wobswět, ratarstwo a geologiju kaž tež nowy předsyda regionalneho zwjazka burow Robert Gülde.
