Wuměłstwo, rjemjesło a kreatiwita zwjazuja wobdźělnikow 19. mjezynarodneje rězbarskeje dźěłarnički w Miłočanskej skale. Dwaj tydźenjej dołho je dźewjeć wuměłcow z cyłeho swěta w kreatiwnej zhromadnosći dźěłało. Tam su swoje ideje do drjewa a wšelakich družin kamjenja přeměnili a cyle rozdźělne skulptury stworili.

Miłoćicy (SN/lmc). Inok Tkachiviski a Inna Tkachiviska pochadźataj z Ukrainy a wobdźělištaj so lětsa druhi raz na mjezynarodnej rězbarskej dźěłarničce při Miłočanskej skale. Njejstaj jenož swójba, ale tež wuměłcaj – wobaj staj něhdy na uniwersiće wučiłoj. Mjeztym zo Inna dale wuwučuje a připódla skulptury zhotuje, wěnuje so Inok dospołnje rězbarstwu. Inna Tkachivska dźěła lětsa z drjewom. Jeje aktualny projekt prezentuje dwě wiolinje. Při tym njejsu wuměłči statiske formy wažne: „Skulptura ma dynamisce skutkować, dokelž so hudźba pohibuje. Hudźba je wšudźe, hudźba je žiwjenje“, praji Inna. Jeje wosebity poćah z hudźbu – rejowanje a spěwanje – chce wona do swójskeho projekta sobu zapřijeć.