Łaz. Po tym zo bě loni dobry wothłós žnjał, wustupi Chór čornomórskich kozakow pod nawodom Petera Orloffa jutře, 18. septembra, w 17 hodź. znowa we Łazowskej cyrkwi. Tež Delnjowujězdźanski muski chór pod nawodom Wolfganga Fristera w koncerće sobu skutkuje.

Nutrnosć za nowe pišćele

Slepo. Na hudźbnu nutrnosć přeprošuje Slepjanska ewangelska wosada jutře, pjatk, w 17 hodź. do swojeje cyrkwje. Tam přednjesu so literarne teksty a zaklinča melodije za pišćele a trompetu. Wunošk kolekty je za nowe pišćele cyr­kwje postajeny. Instrument bu 1945 w poslednich wójnskich dnjach ćežko wobškodźeny a pozdźišo jenož prowizorisce sporjedźany. Nětko je nowonatwar njewobeńdźomny.

Wotewru wustajeńcu

Budyšin. Mólby a rysowanki Jany Böhme­ budu wot jutřišeho w Budyskej Galeriji Budissin na Hrodowskej hasy 19 wustajene. Na wotewrjenje přehladki pod hesłom „Hurtig eilt die kleine Mittagsfrau“­ w 19 hodź. přeprošuje Budyske wuměłstwowe towarstwo. Wu­měłča je na wysokej šuli za wuměłstwo a design w Halle a mjez druhim tež w Mexiku studowała.

Wječor a rano do zwěrjenca