Entertaineraj Joko a Klaas staj swój wusyłanski čas za to wužiwałoj, za EU wabić. Tak rysowaštaj wonaj z pomocu fachowcow, što so stajnje, jelizo so EU rozpušći. Kumštna inteligenca (KI) zwobrazni při akciji zawčerawšim wječor negatiwne wěšćenja, započinajo ze zawrjenymi mjezami a turbulencami na wikach, wo drastiskich stratach dźěłowych městnow, słabym němskim hospodarstwje a dobyću demagogow a nacionalistow, štož by China znjewužiwała.
Zwěrjo na trawniku při kopańcy w USA je přihladowarjow jara zwjeseliło. W běhu prěnjeho połčasa partije w kopańcowej hrě Philadelphia Union přećiwo New York City FC je mjenujcy šup na hrajnišćo běžał. Publikum z mócnym přikleskom reagowaše. Pomocnicy spytachu zwěrjo popadnyć, tola zwěrjo so spočatnje wuwiny. Mjez druhim ze smjećowej tonu šupa po hrajnišću honjachu. Hru dyrbjachu zamołwići krótko přetorhnyć.
Zły Komorow (SN/MiP). W februarje lěta 2020 je Serbowka Hanka Rjelcyna městno społnomócnjeneje za serbske naležnosće we wokrjesu Hornje Błóta-Łužica nastupiła. Zły Komorow a wokolne kónčiny wšak 40lětnej Radworčance njeznate njejsu, wšako je po swojim činohrajnym studiju w Lipsku wot lěta 2009 sem jako dźiwadźelnica na tamnišim Nowym dźiwadle skutkowała. Zo by so w delnjoserbskej rěči wukmaniła, wobdźěli so hnydom po tym, zo bě městno nastupiła, na kompaktnym kursu w Šuli za delnjoserbsku rěč a kulturu w Choćebuzu.
Mnichow (dpa/SN). Generalne statne rěčnistwo w Mnichowje je přepytowanja přećiwo zapósłancej AfD w zwjazkowym sejmje Petrej Bystronej zahajiło a dźensa wjacore objekty přepytowało. Wobsteji podhlad wobtykanja a płokanja pjenjez dla. Zwjazkowy sejm bě do toho imunitu Bystrona zběhnył. Přepytowali su objekty w Berlinje, Mnichowje a na kupje Mallorca. Pječa je Bystron pjenjezy proruskeho propagandoweho sćelaka „Voice of Europe“ brał. Bystron tole prěje.
Prawicarska koalicija hotowa
Den Haag (dpa/SN). Nižozemska dóstanje prawicarsku knježerstwowu koaliciju. Nimale šěsć měsacow po wólbach parlamenta su so radikalny prawicarski populist Geert Wilders a tři dalše strony na koaliciske zrěčenje dojednali. Dale njejasne je prašenje, štó budźe nowy ministerski prezident. Wilders je so zastojnstwa hižo wzdał. Na šefa knježerstwa dyrbja so hišće dojednać, wón rjekny. Koaliciske zrěčenje chcychu dźensa předstajić.
Přepytuja socialne platformy
London/Tel Aviv (dpa/SN). Łódź z Wulkeje Britaniskeje je z nimale sto tonami techniskich srědkow za nuzowe kwartěry po puću do Gazaskeho pasma. Posyłka ma jedna z prěnich być, kotruž w prowizoriskim přistawje wukładuja a do Gazaskeho pasma dowjezu. Jedna so wo 8 400 nuzowych kwartěrow z plastikowych planow w hódnoće 2,3 milionow eurow, britiske wonkowne ministerstwo zdźěla.
Při třěleńcy na sewjeru Gazaskeho pasma su po informacijach wójska pjeć israelskich wojakow zatřělili. Třo dalši wojacy so zranichu. Israelske medije rozprawjeja, zo su wojacy přez brónje swojich towaršow žiwjenje přisadźili. Israelske tanki běchu wčera z granatami na twarjenje w lěhwje ćěkancow Dshabalia třěleli, w kotrymž wojacy běchu. Wobsadka tanka měješe jich mylnje za wobrónjenych Palestinjanow. Tankisća stejachu w tymle času pod wulkim ćišćom, dokelž Palestinjenjo na nich z tanki ničacymi granatami třělachu. Wot spočatka Gazaskeje wójny je tam 626 israelskich wojakow padnyło. 3 500 so zrani.
New York (dpa/SN). Hłowny wobskóržnik Mjezynarodneho swětoweho chłostanskeho sudnistwa je potwjerdźił, zo njebudźe so pospytam zatrašenja podwoleć. Karim Khan reagowaše předwčerawšim, wutoru w Bjezstrašnostnej radźe UNO na komentar nastupajo ćišć z USA: Tam su znjeměrnjeni informacijow dla, po kotrychž chcyło sudnistwo zajeće israelskeho ministerskeho prezidenta Benjamina Netanjahuwa wukazać. „Njedamy so zatrašić, ani přez wukaz zajeća přećiwo mi ani ze zajećom wolenych dostojnikow sudnistwa“, rjekny Khan najwyšemu gremijej UNO a tam přitomnym zastupnikam wetowych mocow. „Smy winowaći, so za sprawnosć zasadźić, zo móhli wopory zastupować a sym sej toho dospołnje wědomy, zo je w tutej rumnosći čłowječich hobrow z wulkej mocu a wliwom“, Khan dale rjekny. Eksistuje pak tajke něšto kaž zakoń, kotremuž je mjezynarodna organizacija zawjazana.