Filmowy wječor
Budyšin. Přichodny filmowy wječor w Ekumeniskim tachantskim wobchodźe wotměwa so póndźelu, 21. oktobra, w 19.00 hodź. Předstaji so film „The Quiet Girl“ irskeho režisera Colma Bairéada. Filmowa drama, kotraž měješe w februaru 2022 na filmowym festiwalu w Berlinje swoju premjeru, ma krótkopowědančko spisowaćela Fostera Claira Keegana jako předłohu a je prěni irsko-rěčny film, kotryž bu za Oscar nominowany.
Dźeń astronomije
Budyšin. Na dnju astronomije, sobotu, 19. oktobra, přeprošuje Budyska šulska hwězdarnja wot 17 do 22 hodź. na wosebity podawk: Prěni raz wot lěta 2020 móžemy na tutym dnju komet na hwězdnišću bjez pomocnych srědkow wobkedźbować. Sobudźěłaćerjo hwězdarnje pak poskićuja zajimcam tež wobkedźbowanja přez teleskop, na přikład planetow Jupiter, Saturn abo wosebiteje žadnostki: Měsačka blisko Plejadow. Tež přednoški k aktualnym temam, mjez druhim wo aktualnym wuwiću astronawtiskeho předewzaća SpaceX, maja we wječornym programje. Zastup za dorosćenych wučinja 10 eurow, za dźěći do 16 lět 5 eurow.
Póndźelniše čitanje
Gmejnska rada Pančicy-Kukow
Pančicy-Kukow. W Lejnjanskim hosćencu „K Lipje“ wotměje so wutoru, 15. oktobra, w 19 hodź. zhromadźizna gmejnskeje rady Pančicy-Kukow, na kotruž wjesnjanosta Markus Kreuz wutrobnje přeprošuje. Mjez druhim poda so rozprawa gmejny k dodźerženju hospodarskeho plana 2024 a znazorni so próstwa wo zwyšenje kapacity wot 32 na 50 pěstowarskich městnow w serbskej pěstowarni we Wotrowje.
Saněruja móst w Koćinje
Koćina. Po tym, zo je so tele dny na sewjernej kromje Koćiny saněrowanje betona při mosće přez Čorny Halštrow zahajiło, je puć do Salowa nětko na wosom dnjow zawrjeny. Wobjězdka přez Hózk je zarjadowana.
Serbske baje za cyłu swójbu
Kulow. Rěčnej motiwatorce projekta ZARI Marija Šołćic a Juliana Kaulfürstowa přeprošujetej wosebje swójby štwórtk, 17 oktobra, wot 10 hodź. do zetkawanišća wustawa Jakubetz w Kulowje na wosebite zarjadowanje k temje „serbske baje“. Tute nochcytej jenož čitajo předstajić, ale so tež zhromadnje na cyle kreatiwne wašnje z nimi rozestajeć.
Gmejnska rada w Radworju
Awtor čita w Budyšinje
Budyšin. Drježdźanski awtor Jens Wonneberger čita w Budyskej měšćanskej bibliotece na Hrodowej 12 ze swojeho romana „Pension Seeparadies“ a to wutoru, 15. oktobra, w 19 hodź. Ze swojim wěstym poetiskim stilom a psychologiskim wóčkom zamóže awtor tež w tutej twórbje čitarja jimać. Z bibliotekskim wupokazom płaći zastup 4 eurow, bjez wupokaza 6 eurow. Zamołwići proša wo telefoniske přizjewjenje pod čo. 03591 534827.
Přistojne zadźerženje nawuknyć
Wojerecy. Srjedu, 16. oktobra, wot 10 do 13.30 hodź. poskićuje Wojerowska ludowa šula wosebitu dźěłarničku za dźěći, kotraž zaběra so z regulemi a normami praweho a přistojneho zadźerženja za blidom. Mjez druhim je tež zhromadne warjenje menija w třoch chodach kaž tež kryće a dekorěrowanje swjedźenskeho blida planowane. Na kóncu spožči so młodym wopytowarjam „prawy“ certifikat. Přeprošene su dźěći w starobje wot 8 do 13 lět. Přinošk za wobdźělenje je 5 eurow.
„Dresscode: Serbski!“
Choćebuz. Dohromady štyri dźěłarnički pod hesłom „Dresscode: Serbski!“ poskićuje Serbski muzej w Choćebuzu a to sobotu, 12. oktobra, wot 14 do 18 hodź. Zajimowani zaběraja so ze serbskej modu za muži a žony. Nazorniše informacije namakaće pod: www.eveeno.com/dresscode-serbski-anmeldung. Pod tutej adresu je zdobom přizjewjenje móžne. Tež předsyda Domowiny Dawid Statnik zarjadowanje wopyta.
Wustajeńca „eksotow“
Kulow. Zjednoćenstwo plahowarjow eksotiskich ptačkow z Njedźichowa přeprošuje zajimcow na wustajeńcu ptačkow a to sobotu kaž tež njedźelu, 12. a 13. oktobra, wot 10 do 17 hodź. do Stareho dwórnišća w Kulowje. W něhdźe 30 woljerach a witrinach prezentuja 30 družin eksotiskich ptačkow z najwšelakorišich kónčin zemje. Někotre z nich su tež na předań. Nastupajo plahowanje a dźerženje ptačkow čłonojo zjednoćenstwa rady poradźuja. Za dźěći su molowanske a paslenske poskitki přihotowane.
Nazymski koncert w Slepom
Hwězdne stawiznički
Budyšin. Budyska šulska hwězdarnja přeprošuje sobotu, 12. oktobra, cyłu swójbu na dalši přednošk kołowokoło powěsće wo grjekskim rjeku Heraklesu. W napjatej stawiznje wojuje wón mjez druhim přećiwo třihłowatym hobram a staji so naposledk poslednjemu wulkemu wužadanju. Je-li jasne wjedro, móža zajimowani po přednošku z teleskopom komet „Tsuchinshan-ATLAS“ na nócnym njebju wobkedźbować. Komet je jenož zrědka na njebju widźeć. Dyrdomdej započina so w 19.30 hodź. Zastup za dorosćenych je 10, za dźěći 5 eurow.
Swjedźeń na rybarskim dworje
Mały Holešow. Přirodoškitna stacija Njeswačidło přeprošuje njedźelu, 13. oktobra, wot 10 do 18 hodź. na swój nazymski swjedźeń. Tutón woswjeći lětsa na rybarskim dworje w Małym Holešowje blisko Njeswačidła. Wopytowarja wočakuja mjez druhim kirbsowe wubědźowanje, live-hudźba, kreatiwne paslenje, wiki, sušena ryba a rybjaca poliwka kaž tež čerstwe pječwo z burskeje pjecy a hišće wjele wjace.
Prózdniny w Serbskim muzeju
Budyšin. Prózdninske poskitki Serbskeho muzeja w Budyšinje wěnuja so lětsa Krabatej. Štwórtk, 10. oktobra, přeprošuje dźěći wot 10 do 12 hodź. na dožiwjenske zarjadowanje, mjez druhim z kuzłarjom, kotryž předstaja swoje kuzłarske činki. Po tym steji kreatiwna zaběra z powěsću wo Krabaće na programje. Popołdnju wot 14 do 15.30 hodź. přeprošuje muzej na wjedźenje pod hesłom „Krabat a Šajatović. Mjez mytosom a čłowjekom.“ Tu předstajeja muzejownicy mjez druhim regionalne a časowe zwiski mjez Krabatom a historiskej wosobinu Jankom Šajatovićom.
Na serbsku wuprawu za swójby
Přednoškaj wo wjedrje
Wojerecy. Wojerowska ludowa šula přeprošuje wšitkich zajimcow pjatk, 11. oktobra, do tamnišeho kina a to w 10 hodź. a 20 hodź. na filmowej přednoškaj mytowaneho filmowca přirody Robina Jähne pod titulom „Im Bann der Blitze – Natur im Gewitter“. Mjez jimacymi filmowymi scenami rozprawja wón wo swojich hońtwach za wichorami, fascinowacych dožiwjenjach ze zwěrjatami a dalšich wjedrowych fenomenach. Zastup je darmotny. Wobmjezowaneje ličby městnow dla pak organizatorojo wo přizjewjenje proša a to telefonisce pod 03571 20937200 abo z mejlku na: .
Powědacy fotowy album
Budyšin. W Budyskej Serbskej kulturnej informaciji (SKI) poskićuje motiwatorka za serbsku rěč projekta ZARI Marija Šołćic srjedu, 9. oktobra, wot 10 do 12 hodź. prózdninsku dźěłarničku pod hesłom „Zhotowju sej swój powědacy fotowy album“. Wobdźělenje je bjezpłatne. Zajimowani njech přinjesu fotowy album, USB-stick a jeli to chcedźa paslenski material za wudebjenje albuma sobu. SKI prosy wo přizjewjenje nanajpozdźišo dźeń do termina w SKI pod tel. čo. 3591 550111 abo z mejlku na: .
Na Šusterojc ławku při kachlach
Trjebin. Juliana Kaulfürstowa, rěčna motiwatorka projekta ZARI, přeprošuje štwórtk, 10. oktobra, w 15 hodź. na zetkanje „Na Šusterojc kachlowej ławce“, na Šusterojc dworje w Trjebinje – ze serbskimi burskimi kaznjemi ze Slepjanskeje wokoliny kaž tež z domoródnej jědźu po starych receptach.
Pawk swjeći 30. jubilej
Jaseńca. Serbske młodźinske towarstwo Pawk přeprošuje nětčišich a něhdyšich „Pawkow“, spěchowacych čłonow kaž tež přećelow pjatk, 11. oktobra, wot 19 hodź. do wjesneho kluba w Jaseńcy na zhromadny wječor ze spěwom a bjesadu składnostnje jubileja swojeho 30lětneho wobstaća. Na zarjadowanju chcedźa wo wosobinskich stawiznach a dožiwjenjach rěčeć. Za to maja wotewrjene křesło natwarjene, na kotrež je kóždy wutrobnje witany. Štóž chce, njech sej rady swój instrument sobu přinjese.
Gysi z hosćom w Kamjencu
„Mašina“ z intimnymi pěsnjemi
Budyšin. Z jara wosobinskim wuběrkom spěwow pod hesłom „Lieder für Generationen – Maschine Intim“ wustupi spěwar, komponist a tekstowar legendarnych Puhdyjow Dieter „mašina“ Birr pjatk, 4. oktobra, w 20 hodź. w Budyskej Krónje. Zastup płaći 43,45 eurow.
Nazymske wiki w Dołhej Boršći
Dołha Boršć. Skónčnje zaso tak daloko je! Přirodoškitna stacija Wuchodna hornja Łužica přeprošuje sobotu, 5. oktobra, wot 14 do 17 hodź. na nazymske wiki pod starym dubom při młynje w Dołhej Boršći (Förstgen). Tu móžeće sej wikowanje, kupowanje a přijomne rozmołwy lubić dać. K tomu poskićuja organizatorojo mjez druhim chłóšćenki z wowčeho mjasa, wězo pak tež bjezmjasne jědźe kaž tež lód a tykanc.
Zmije pušćeć w Smječkecach
Smječkecy. Štwórtk, 3. oktobra, w Smječkecach zaso zmije pušćeja. Na to přeprošuje Smječkečanski wjesny klub wšitkich wulkich a małych přećelow wětřikec hólcow a to wot 15 hodź. na łuku za Bjeńšec twarskim dworom. Tam poskićuja tež lětsa zaso słódne čerstwe plincy.
Online-serwis za jězdźidła
Swjatočnosć na Tuchorju
Budyšin. Składnostnje ponowjenja narowneho pomnika za organista Karla Edwarda Heringa kaž tež narowneje platy za Johanna Gottlieba Dresslera na Tuchorskim pohrjebnišću wotměje so tam njedźelu, 6. oktobra, w 17 hodź. wosebita swjatočnosć. Dressler běše wot 1832 do 1858 direktor krajnostawskeho wučerskeho seminara w Budyšinje. Jako tajki je wón na wosebite wašnje serbski wučerski dorost spěchował. Karl Eduard Hering płaći jako hudźbny wučer Korle Awgusta Kocora, dokelž skutkowaše wot 1837 jako tajki na krajnostawskim wučerskim seminarje. Na zarjadowanju zahraje pozawnowy chór mjez druhim kěrlušowe sadźby Heringa. Hagen Schulz z Budyskeho muzeja kaž tež Měrko Šołta budźetaj wo žiwjenju Dresslera a Heringa rozprawjeć. Přizamknje so dwurěčny wječorny nyšpor z hudźbnym wobrubjenjom w Tuchorskej cyrkwi.
„Pomhamy našim jěžam“
