Jedyn bus pojědźe, tamny nic
Budyšin. Za jutře w 19.30 hodź. planowane předstajenje NSLDź „Dołhož fenki běža“ dyrbi chorosće dla wupadnyć. Město toho hraja na wulkim jewišću kruch „Greta“ Serbskeho činohrajneho studija. Hižo kupjene zastupne lisćiki wostanu płaćiwe abo hodźa so hač do 20. měrca za hinaše předstajenje zaměnić. Planowany bus wot Miłoćic přez PančicyKukow njepojědźe. Dalši bus pak budźe zasadźeny, a to we 18.15 hodź. wot Němcow přez Kulowc, Kulow, Salow, Sulšecy, Šunow a Róžant. Jězba płaći dwaj euraj, zastupny lisćik sydom eurow.
Přechod so zminje
Ćisk. Němska železnica chce jutře, sobotu, železniski přechod na Budyskej dróze w Ćisku wotstronić. Kaž Wojerowske měšćanske zarjadnistwo zdźěli, so tak tež přechod za pěškow zminje. Wobydlerjow proša za to wo zrozumjenje.
Poskitk wobmjezuja
Přewjedu serbski wječor
Łaz. „Stawizny, drasta a spěw“ rěka hesło serbskeho wječora, na kotryž přeproša spěchowanske towarstwo Łazowskeho zetkanišća Dom Zejlerja a Smolerja jutře, pjatk, we 18 hodź. Z hosćom budźetaj Cyžec mandźelskaj Monika a Bjarnat z Noweje Jaseńcy. Zabawnje a informatiwnje podataj wonaj dohlad do stawiznow, kultury a rěče Serbow. Zastup je darmotny.
Nowe ideje přednjesć
Njebjelčicy. Prěni wječor noweho rjadu zarjadowanjow gmejny Njebjelčicy a ludoweje uniwersity wokrjesa Budyšin wotměje so jutře, pjatk, w 19 hodź. na Njebjelčanskej gmejnskej žurli. Pod hesłom „Hromadźe na wsy myslić, wuknyć, wuwić, činić“ móža wobydlerjo swoje namjety přednjesć, kak sej wuwiće gmejny a jednotliwych wsow předstajeja. Přeprošeni su wobydlerjo a čłonojo towarstwow wšěch wjesnych dźělow.
Wo literaturje a rěči
Drježdźany. Kulturny wječor wo serbskej literaturje a rěči přewjedu jutře, pjatk, w 19 hodź. w Drježdźanskim wuměłstwowym domje Raskolnikow. Na zarjadowanju wobdźěla so Drježdźanske serbske dźěći, Benedikt Dyrlich a Kirsten Bejmina z Wojerec.
Přizwolenje dóšło
Brězowka (AK/SN). Gmejna Dźěwin chce Dźěwinske wjesne srjedźišćo znowa wuhotować. Kaž wjesnjanosta Helmut Krawc (Wolerske zjednoćenstwo Dźěwin) na zašłym posedźenju gmejnskeje rady w Brězowce zdźěli, je přizwolenje za spěchowanske srědki we wobjimje 75 procentow mjeztym dóšło. Mjez druhim maja wosrjedź wsy pěc, wotpočnišćo za kolesowarjow a parkowanske městna nastać. Cyłkowna naprawa płaći něhdźe 150 000 eurow. Štwórćinu toho ma gmejna sama zapłaćić. Financować chce wona swój podźěl z inwesticiskeje pawšale Swobodneho stata Sakskeje.
Njebjo wobkedźbować
Budyšin. Na prašenje, kotre hwězdy su tuchwilu nad Budyšinom widźeć, wotmołwja jutře, srjedu, wot 19 hodź. w Budyskej hwězdarni. W planetariju dóstanu zajimcy zawod do nalětnjeho hwězdnišća. Při dobrych wuměnjenjach změja wopytowarjo składnosć, z pomocu dalokowidow wšelake objekty na njebju wobkedźbować.
Změje rěčne hodźiny
Kamjenc. Zapósłanc Sakskeho krajneho sejma Alojs Mikławšk (CDU) změje srjedu, 11. měrca, wot 13 do 17 hodź. dalše rěčne hodźiny w swojim Kamjenskim běrowje na Zapadnej 4. Zajimcy móža sej do toho termin dojednać, a to pod telefonowym čisłom 03578/ 305 383 abo e-mailnje pod . Wočinjeny je běrow wot póndźele do štwórtka, stajnje wot 8 do 16 hodź., a pjatk wot 8 do 14 hodź.
Filmowu dokumentaciju widźeć
Budyšin. Přichodne zarjadowanje sekcije hudźby Maćicy Serbskeje a Towarstwa za staru serbsku ludowu hudźbu wotměje so srjedu, 18. měrca, w 19 hodź. w sydarni čo. 106 Budyskeho Serbskeho domu. Tam pokazaja filmowu dokumentaciju serbskich ludowych rejow. Wšitcy zajimcy su wutrobnje witani.
Zhromadnje hrać
Budyšin. Štóž rady towaršnostne hry hraje a za to sobuhrajerjow pyta, nadeńdźe jich snano w Budyskej měšćanskej bibliotece. Tam steji zajutřišim, srjedu, wot 14 do 17 hodź. dalše hrajne popołdnjo na programje. Towaršnostne hry a dalše zabawjenske medije móža sej zajimcy w bibliotece tež wupožčić.
Do serbskeho archiwa
Budyšin. Na cyłoněmskim dnju archiwow wobdźělitej so jutře, sobotu, tež Serbski kulturny archiw a Serbska centralna biblioteka w Budyskim Serbskim instituće. Wot 14 hodź. su zajimcy na čitanje přeprošeni, hdźež zhonja wo priwatnych, oficialnych a kurioznych zdźělenkach z listow znatych abo zabytych serbskich wosobinow. W 14.30 hodź. započnje so crashkurs za čitanje serbskeje fraktury w historiskich dokumentach. Wot 15 hodź. wodźa wopytowarjow serbsce a němsce po archiwje a bibliotece, w 15.30 hodź. pokazaja film „Lěto 1950 w Serbach“.
Z wyšim měšćanostu porěčeć
Delnja Kina. Na wobydlerski forum přeprosy Budyski wyši měšćanosta Alexander Ahrens (SPD) wobydlerjow Delnjeje Kiny wutoru, 10. měrca, w 19 hodź. do tamnišeje gratownje wohnjoweje wobory. Dale wobdźěla so twarska měšćanostka a jeje kolega za financy, zastupjerjo policije a mobilneho młodźinskeho dźěła, kotřiž na prašenja wobydlerjow wotmołwjeja.
Lajkojo dźiwadźeleja
Archiw přistupny
Hotowarniče so zetkaja
Chrósćicy. Župa „Michał Hórnik“ přeproša na zetkanje hotowarničow katolskeje narodneje drasty, kotrež je jutře, štwórtk, w 19 hodź. w Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.
Skupinarjo přeprošeni
Pančicy-Kukow. Domowinska skupina Pančicy-Kukow přeproša swojich čłonow a dalšich zajimcow na přichodne zarjadowanje jutře, 5. měrca, w 19 hodź. w awli Šule Ćišinskeho. Tam přednošuje Pětr Rab z Kukowa ze swětłowobrazami wo swojich dožiwjenjach w srjedźnej Rumunskej. Wšitcy su wutrobnje witani.
Znowa wosebita přehladka
Jutře na premjeru
Budyšin. Nowa inscenacija Serbskeho činohrajneho studija w Němsko-Serbskim ludowym dźiwadle „Greta“ změje jutře, srjedu, w 19.30 hodź. w Budyskim Dźiwadle na hrodźe premjeru. Hraja Maria-Helena Bretschneiderec, Katja Hrjehorjec a Clemens Bobka. Wšitcy přećeljo serbskeho dźiwadła su wutrobnje přeprošeni.
Čita z manuskripta
Budyšin. Žónska unija Budyskeho wokrjesa planuje lětsa wjacore zarjadowanja pod hesłom „30 lět znowazjednoćenje“. Prěnje wotměje so jutře, srjedu, w 19 hodź. w Budyskim hotelu „Residence“ na Wjelećanskej. Tam čita bywša zapósłanča zwjazkoweho sejma Marja Michałkowa ze swojeho knižneho manuskripta. Tak dopomina so mjez druhim na wólby poslednjeje Ludoweje komory NDR před 30 lětami, kotrejž je wona tohorunja přisłušała. Po čitanju budźe składnosć k diskusiji.
Nowa wustajeńca
Hotowarniče so zetkaja
Chrósćicy. Župa „Michał Hórnik“ přeproša na zetkanje hotowarničow serbskeje katolskeje narodneje drasty, kotrež budźe štwórtk, 5. měrca, w 19 hodź w nowym Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.
Stajne blido Zelenych
Kamjenc. Přichodne stajne blido Zelenych wotměje so jutře, wutoru, wot 19 hodź. w Kamjenskim hosćencu „La Piazza“ na Zwingerowej. Z hosćom budźe zapósłanc krajneho sejma Valentin Lippmann, zastupowacy předsyda frakcije Zwjazka 90/Zelenych. Z nim chcedźa so předewsěm wo tym rozmołwjeć, kak hodźało so w Swobodnym staće Sakskej wěstotne połoženje polěpšić.
Regionalne wolije sej zbližić
Wojerecy. Rěpik, len a dalše rostlinske wolije steja w srjedźišću přichodneho zarjadowanja „Klewernje a kreatiwnje warić“ srjedu, 4. měrca, w 19 hodź. na Wojerowskej dźěćacej a młodźinskej farmje. Zežiwjenska wědomostnica Elžbjeta Hojerjowa tam rozłoži, kak wolije skutkuja a kak hodźa so w kuchni wužiwać.
Rozprawjatej wo putnikowanju
Chrósćicy. Poslednje zarjadowanje kulturneje zymy 2019/2020 w Chróšćanskej putniskej hospodźe jutře, sobotu, w 19.45 hodź. wuhotujetej putniska mać Monika Gerdesowa a Beate Gruß. Wonej stej w běhu dwanaće lět po etapach wjace hač 3 000 kilometrow wot Zhorjelca hač do Španiskeje putnikowałoj. Wo poslednjej etapje z Leóna do Santiaga de Compostela budźetej wonej jutře němsce rozprawjeć. Hižo w 16 hodź. poběži tam w serbskim dźěćacym kinje trikowy film „Šmjatańca w raju bajkow“.
Wo swójbnych mjenach
Budyšin. Přichodne zarjadowanje w rjedźe Budyskeje akademije wotměje so póndźelu, 2. měrca, we 18 hodź. w čitarni statneje studijneje akademije na Lubijskej. Referent je znaty slědźer mjenow prof. dr. Jürgen Udolph z Göttingenskeje akademije wědomosćow. Dokelž jewi so w Sakskej wulki podźěl słowjanskich a serbskich mjenow, so referent tež tutej temje wěnuje. Zastup je darmotny.
