Skutkuje na dobro wšěch

wutora, 10. měrca 2020 spisane wot:

Ma-li na wsy dobra zhromadnosć wobydlerjow knježić, trjebaš ludźi, kotřiž so za to angažuja. W Nowoslicach maja za to mału wjesnu radu, kotraž ma agilnu předsydku.

Nowoslicy (aha/SN). Po lońšich komunalnych wólbach steji na čole Nowosličanskeje wjesneje rady Christina Domašcyna. Młoda agilna žona je po wuchodźenju Chróšćanskeje šule 1997 w Smochčanskim Domje biskopa Bena powołanje kucharki nawuknyła. Mjeztym dwaj lětdźesatkaj bydli ze swójbu w Nowoslicach. Christinu Domašcynu pak njeznaja jenož w Nowoslicach. Mnohim je wona tež znata, zo w Kamjenskej předawarni EDEKA serbskich kupcow w maćernej rěči posłužuje.

Z mopedom do štoma zrazył

wutora, 10. měrca 2020 spisane wot:
Tragiski wukónc měješe wčera popołdnju jězba 60lětneho z mopedom na wo­krjesnej dróze mjez Rakojdami a Poršicami wuchodnje Budyšina. Za křiwicu nalěwo zajědźe wón nadobo na prawy bok puća a zrazy tam do štoma. Alarmowani wuchowarjo spytachu mužej pomhać, ale bjez wuspěcha. Wón hišće na městnje nje­zboža wudycha. Wobdźěłanja njezboža a přepytowanja blišich wobstejnosćow dla bě dróha něhdźe tři hodźiny zaraćena. Wujasnjene dotal hišće njeje, čehodla je mopedist z puća zjěł. Foto: Jens Kaczmarek

Krótkopowěsće (10.03.20)

wutora, 10. měrca 2020 spisane wot:

Krawcowy roman znowa wušoł

Budyšin. Roman Křesćana Krawca „Das Ende vom Paradies“ je w Budyskej Smolerjec kniharni zaso předań. Wuspěšna twórba je w dalšim nakładźe jako kapsna kniha w LND wušła. W publikaciji wopisuje Krawc na wjac hač 600 stronach žiwjenje serbskeje swójby přez tři generacije wot spočatka 20. lětstotka hač do 1980tych lět. Kniha je wulkotny mozaik žiwjenja wjesnych ludźi.

Integraciske wiki wotprajene

Lubij. Hladajo na stupace ličby na coro­na-wirus schorjenych w Budyskim wokrjesu su jutřiše integraciske wiki „Ankommen und Leben“ w Lubiju wotprajili. Wokrjes Zhorjelc je přehladku na 16. september přesunył. Kaž Zhorjelski krajny rada Bernd Lange (CDU) zdźěli, stejitej strowota a wěstota wobydlerjow na prěnim městnje.

Prócuja so znowa wo BUGA

Policija (10.03.20)

wutora, 10. měrca 2020 spisane wot:

Třo młodostni zranjeni

Nowoslicy. Přewulka spěšnosć bě najskerje přičina wobchadneho njezboža dźensa w nocy w Nowoslicach. Na statnej dróze S 101 je so z Chróšćanskeho směra přijěducy wodźer Forda suwać započał, do přirowa zajěł a zwróćił. Wón a dalšej młodostnaj so ćežko zranichu. Nimale 30 wohnjowych wobornikow z Chrósćic, Nuknicy, Sernjan a Ralbic bě zasadźenych. Woni městno wuswětlichu a pomhachu při transporće zranjenych. Lětnje wobruče awta běchu chětro wotjězdźene.

Přizwolenje dóšło

wutora, 10. měrca 2020 spisane wot:

Brězowka (AK/SN). Gmejna Dźěwin chce Dźěwinske wjesne srjedźišćo znowa wuhotować. Kaž wjesnjanosta Helmut Krawc (Wolerske zjednoćenstwo Dźěwin) na zašłym posedźenju gmejnskeje rady w Brězowce zdźěli, je přizwolenje za spěchowanske srědki we wobjimje 75 procentow mjeztym dóšło. Mjez druhim maja wosrjedź wsy pěc, wotpočnišćo za kolesowarjow a parkowanske městna nastać. Cyłkowna naprawa płaći něhdźe 150 000 eurow. Štwórćinu toho ma gmejna sama zapłaćić. Financować chce wona swój podźěl z inwesticiskeje pawšale Swobodneho stata Sakskeje.

Njebjo wobkedźbować

Budyšin. Na prašenje, kotre hwězdy su tuchwilu nad Budyšinom widźeć, wotmołwja jutře, srjedu, wot 19 hodź. w Budyskej hwězdarni. W planetariju dóstanu zajimcy zawod do nalětnjeho hwězdnišća. Při dobrych wuměnjenjach změja wopytowarjo składnosć, z pomocu da­lokowidow wšelake objekty na njebju wobkedźbować.

Přeja sej přiručku a terminologiju

póndźela, 09. měrca 2020 spisane wot:

Chrósćicy (JK/SN). Stólcy w sydarni Chróšćanskeho gmejnskeho a kulturneho srjedźišća njejsu dosahali, jako so tam minjeny štwórtk šwalče a hotowarniče katolskeje narodneje drasty zeńdźechu. Na hižo tradicionalne zetkanje, kotrež organizuje předsydstwo Kamjenskeje župy pod nawodom Zale Cyžoweje a regionalneje rěčnicy Kathariny Jurkoweje, bě 25 zajimčow z nimale wšitkich serbskich wosadow přišło. Tež wšitke starobne skupiny­ běchu zastupjene, štož swědči wo tym, zo so tež młoda a młódša ge­neracija serbskej drasće, jeje wužiwanju a woblěkanju wěnuje.

Twarja škitnu murju při šuli

póndźela, 09. měrca 2020 spisane wot:
Zo móhli chowancy Slepjanskeho noweho němsko-serbskeho šulskeho centruma woměrje wuknyć, twarja tam sobudźěłaćerjo firmy Nadebor škitnu murju mjez kubłanišćom a Bierholdtec betonowym zawodom. Sćěna je tři metry wysoka, 50 metrow dołha a wobsteji z tak mjenowanych betonowych sadźenskich sudobjow. Te drje su tuchwilu hišće trochu njenahladne, bychu pak so pozdźišo zdźěla zwosadźeć hodźeli a móhli potom rjeńši napohlad skićić. Hłowa wěc pak je, zo sćěna haru z betonoweho zawoda wotdźerži. Foto: Joachim Rjela

Zaso orchideje poskićeli

póndźela, 09. měrca 2020 spisane wot:

Slepo (SN). Jedne z najwoblubowanišich zarjadowanjow w běhu lěta w Slepjanskim Serbskim kulturnym centrumje je přehladka orchidejow. Wona je kónc tydźenja wjace hač tysac ludźi přiwabiła. Hłownje wuhotujetej ju zahrodnistwje z Ranja (Großräschen) a bliskeho Allmosena. Wosebitosć orchidejow je, zo ma lědma druha kwětka telko družin, mjenujcy 28 000.

Nanajwjetši dźěl wopytowarjow je sej sobotu a njedźelu jednu z poskićenych orchidejow kupił. Wažne je, zo maja wone swětłe městno, ale nic w połnym słóncu. Jónu wob tydźeń přiliwać dosaha. „Orchideje dyrbjeli lubowarjo kwětkow kóždej dwě lěće do druheho hornca přesadźić“, poruča plahowar Lutz Leh­radt z Allmosena. Tohodla su po lońšej přestawce tónle serwis zaso poskićeli.

Krótkopowěsće (09.03.20)

póndźela, 09. měrca 2020 spisane wot:

Dalši rjad mólbow wudała

Budyšin. Wuměłča Ulrika Mětškowa dalši rjad mólbow na zakładźe Franza Schuberta zhudźbnjenych basnjow Johanna Ludwiga Wilhelma Müllera stworiła. Brošurka „Die schöne Müllerin“ wopřiji­ma 20 reprodukcijow twórbow Budyšanki. W samonakładźe wudatu brošurku dóstanu zajimcy pola Ulriki Mětškoweje, wobmjezowanu ličbu ma Budyska Smolerjec kniharnja na předań.

Kontrole na mjezach

Praha/Waršawa. Čěska chce na swojich mjezach pućowacych kontrolować, zo by rozšěrjenju chorosće płucow corona-wirusa dla zadźěwała. Wot dźens­nišeho policija na dźesać namjeznych přecho­dach do Bayerskeje, Awstriskeje a Słowakskeje kontroluje. Pólska chce pućowacych z Němskeje na A 4 w Jędrzy­cho­wicach pola Zhorjelca kontrolować.

Płaćiznu maskow regulowali

Policija (09.03.20)

póndźela, 09. měrca 2020 spisane wot:

Kaž njemdry jězdźił

Horni Wujězd. Awtodróhu A 4 mjez Hornim Wujězdom a Słonej Boršću je drje 44lětny wodźer VWja Amarok sobotu z wubědźowanskej čaru zaměnił. Přesća­hnywši ciwilne awto sakskeje hotowostneje policije na prawym boku wón krótko před nim zaso dolěwa zawiny. Jeno ze spěšnej reakciju móžeše šofer policajskeho awta hóršemu zadźěwać. Na wotpočnišću Hornja Łužica-juh bě jězba 44lětneho skónčnje nimo. Tam njejsu jenož jeho jězbnu dowolnosć sćazali, ale nańdźechu pola njeho tež elektrošoker a nóž.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND