Za njesprócniwe čestnohamtske narodne dźěło připóznaće žnjeli

Budyšin (SN/JaW). Předsyda Domowiny Dawid Statnik je pjatk wječor na žurli Budyskeho Serbskeho domu lětuše Myto Domowiny a Čestne znamješka Domowiny zasłužbnym Serbam za jich čestnohamtske skutkowanje spožčił. W narěči Statnik wuzběhny, zo je to připóznaće njesprócniweho narodneho dźěła, kotrež počesćeni na wšelakich městnach wukonjeja. „Naš mały lud njeby přetrał bjez tajkich ludźi kaž was, kotřiž dźeń wote dnja, často přez lěta, tójšto wjace činiće, hač so wo swój wšědny chlěb starać, kiž zajimujeće so za swojich bratrow a sotry, za našu domiznu, rěč, stawizny a kulturu“, praješe předsyda Domowiny.