Tingleff (SN/JaW). Skupina čłonow młodźinskeho towarstwa Pawk, mjez nimi předsydka Pawka Kristin Heelemanec, přebywa na nazymskim seminarje Młodźiny europskich narodnych mjeńšin (MENS) w danskim Tingleffje. Hač do njedźele zeznajomjeja so tam z třinarodowej frizisko-němsko-danskej namjeznej kónčinu.
Dźensa su tydźenski seminar w sewjerofriziskim Klanxbüllu oficialnje wotewrěli. Wječor so wobdźělnicy dalekubłanja předstaja a prezentuja na tak mjenowanych wikach wuměny wosebitosće swojeje mjeńšiny. W běhu tydźenja su wjacore ekskursije planowane, mjez druhim na sewjerofrizisku kupu Föhr a do Flensburga. Tak chcedźa sej žiwjenje, aktualne połoženje kaž tež ćeže třoch sewjernych mjeńšin, Frizow, Danow w Němskej a Němcow w Danskej, zbližić.