Kulow (HH/SN). Prěni z třoch planowanych wječorow kołowokoło katolskeje narodneje drasty je Kulowske towarstwo Bratrowstwo zawčerawšim na starej šuli w Kulowje přewjedło. Na te wašnje chcedźa zajimcow ze serbskej narodnej drastu bliže zeznajomić a jim pokiwy dać, kak so ju najlěpje woblěkać.
Prěni wječor móžeštej předsydka Bratrowstwa Sonja Hrjehorjowa a čłonka předsydstwa Birgit Suchowa dohromady dźesać zajimčow witać, kotrež chcedźa k tomu přinošować, zo njeby so serbska drasta ze wšědneho žiwjenja pozhubiła. Tak chce Marina Pruchowa ze Sulšec prawje wjele wo dźělach drasty, wo płatach, wo wušiwanju atd. zhonić, zo móhła to swojimaj dźowkomaj dale dać. Sonja Hrjehorjowa je so drastu sama woblekła, rozłožejo při tym wosebitosće a rozdźěle. Přitomne mjez druhim zhonichu, zo je pola njewudatych holcow, kotrež swoj štawt šnóruja, rozdźělow we wašnju šnórowanja a zo maja wudate žony knefle.
