Budyšin/Praha (Łu/SN). Na dnju swjateho Václava w Čěskej republice, 28. septembra, předstajichu w Praskim měšćanskim dźělu Malá strana prěni raz zjawnosći rotundu, cyrkwičku swjateho Václava. Rotunda słuša k najstaršim swědkam křesćanskich korjenjow Čechow a zdobom spočatkow čěskeho narodneho wědomja. Wona je z 11. lětstotka znata a zda­ so ze załoženjom a přetwarom na jezuitski klóšter zničena. W lěće 2004 storčichu archeologojo na powostanki, kotrež słušeja po sekularizaciji (1803) Karlowej uniwersiće, hdźež je z toho časa Matematisko-fyzikalna fakulta Karloweje uniwersity zadomjena.