Lipšćanske studentiske towarstwo Sorabija 300. narodniny swjećiła
Lipsk (ddy/SN). Kónc tydźenja swjećachu w Lipsku njewšědny jubilej: Najstaršemu serbskemu towarstwu, Lipšćanskej Sorabiji, móžachu k 300. narodninam gratulować. Wot šěsć serbskich studentow ewangelskeje teologije załožene zjednoćenstwo słužeše jim něhdy za zhromadne zwučowanje prědowanja. Dźensa je Sorabija towarstwo wšitkich serbskich studentow w Lipsku. Wot tohole sebjezrozumjenja wotwodźowaše so tež jubilejny program, kotryž cyły dźeń traješe. Tak běchu so studenća dlěje hač lěto na wulki podawk přihotowali. Podpěru dóstachu wosebje ze stron Domowiny, Maćicy Serbskeje a Załožby za serbski lud, kotraž je swjedźeń jako projekt wuhotowała. Bywši čłonojo Sorabije běchu tohorunja do Lipska prošeni, a woni składnosć tež rady wužiwachu.
