Wubědźowanje wo najrjeńšu meju a wjazanje křižerskich seklow

Chrósćicy (SN/JaW). Domowinska župa „Michał Hórnik“ Kamjenc je na swojim wčerawšim 1. wuradźowanju w nowym lěće dźěłowy plan nastajiła a kandidatow za wólby Zwjazkoweho předsydstwa Domowiny nominowała.

Kaž čłonka předsydstwa a regionalna rěčnica Domowiny za teritorij Kamjenskeje župy Katharina Jurkowa wčera informowaše, nastupja za župu Zala Cyžowa, Bjarnat Cyž a Chróšćanski wjesnjanosta Marko Kliman (CDU) k wólbam zwjazkoweho předsydstwa. Tež trěbnych 23 de­- legatow na Hłownu zhromadźi­znu Domowiny 25. měrca we Wojerecach su wčera nominowali. „Zdźěla su so delegaća sami přizjewili, štož mje najbóle zwjesela. Dale so wjeselu, zo su so młodostni­ zwólniwi wuprajili župu na zhromadźi­znje zastupować. Tak mamy dobru starobnu měšeńcu delegatow“, Katharina Jurkowa wuzběhny. Zdobom dojednachu so přitomni na to, jako kandidata za předsydu­ Domowiny namje­tować Dawida Statnika. „To jemu rjap skruća“, podšmórny Clemens Škoda.