Serbscy rjemjeslnicy z nowostku poručenje

srjeda, 06. decembera 2017
artikl hódnoćić
(0 )
Ideju za wabjenske přiwěšatko z dwurěčnym napisom měješe Wotrowski blidar Jan Wjenk. Nowostka hodźi so jako rjany suweněr turistam abo tež jako dar přećelam. Z nowostku wabja za Łužicu a serbskosć.  Foto: SN/Maćij Bulank Ideju za wabjenske přiwěšatko z dwurěčnym napisom měješe Wotrowski blidar Jan Wjenk. Nowostka hodźi so jako rjany suweněr turistam abo tež jako dar přećelam. Z nowostku wabja za Łužicu a serbskosć. Foto: SN/Maćij Bulank

Budyšin (SN/JaW). Zwjazk serbskich rjemjeslnikow a předewzaćelow ZSRP wabi z nowostku za dwurěčnu Łužicu a Serbow. Tole wobkrući našemu wječornikej předsydka towarstwa Monika Cyžowa na naprašowanje.

Nowosć je tak mjenowane přiwěšatko, kotrež su k 20lětnemu wobstaću ZSRP zhotowić dali. „Ideju měješe Wotrowski blidar a čłon towarstwa Jan Wjenk“, rozłoži Monika Cyžowa. „Přiwěšatko z drjewa je kulojte a na nim widźeć je silueta Budyšina. Nad a pod tym je dwurěčny napis ‚Łužica, moja domizna‘ a ‚Lausitz, meine Heimat‘“. Prjedy pak hač bě wšitko dozrawjene je tola něšto časa zašło, Cyžowa přiznawa. Z poradu čłona towarstwa a wabjenskeho fachowca Joachima Lipiča ze Žuric pak móžachu dosć tychle drjewjanych suweněrow zhotowić dać. „Mamy je w dwěmaj wulkosćomaj. Wužiwać hodźi so wone jako přiwěšatko za kluče, přičinić móžeće pak je tež za zasmyk toboły abo kapy. Nimo toho móžeće je tež z banćikom w serbskich barbach skompletować abo jednorje jako dar tež němskim a dalšim hosćom wužiwać“, wabi Cyžowa. Kelko su zhotowić dali wona njepřeradźi, jeno zo maja jich dosć.

wozjewjene w: Towarstwa
Prošu přizjewće so, chceće-li komentar podać

nawěšk

nowostki LND