Rowno (SN/JaW). Kubłanski wuběrk Zwjazkoweho předsydstwa Domowiny budźe w rozšěrjenej dźěłowej skupinje kubłanske naležnosće, předewšěm wo dalewuwiwanju WITAJ-prócowanja, rozjimać. Na to je so zwjazkowe předsydstwo minjeny pjatk w srjedźołužiskim Rownom dojednało. Analyzować chce sku­pina dotalne iniciatiwy k zachowanju a dalewuwiću serbskeje rěče w pěsto­warnjach a šulach. Wjacori čłonojo gremija wuprajichu so zwólniwi w skupinje sobu dźěłać, mjez druhim Kito Ela, Judit Šoł­ćina, Jan Nuk, Bjarnat Cyž a Kathrin Suchec-Dźisław­kowa.