Prěni serbski projekt strukturneje změny w Delnjej Łužicy předstajeny

Choćebuz (SN/at). Prěni serbski projekt strukturneje změny w Delnjej Łužicy su wobdźěleni partnerojo wčera w Choćebuskim Serbskim domje předstajili. Byrnjež jeho titl „Hódnoćenje imaterielneho kulturneho namrěwstwa Delnjeje Łužicy w němsko-serbskim konteksće“ tróšku spěrawje klinčał, tči za tym wulki wužitk.

„Ludowe nałožki, pěsnje, muzealne zběrki njejsu dosahajcy registrowane, ana­lyzowane a digitalizowane“, wopisowaše jednaćel Delnjołužiskeje projektneje towaršnosće Domowiny (Dompro) Frank Kosyk wuchadźišćo. Dompro je cyłk, kotryž stara so wo zarjadniske naležnosće projekta. Tak móžetej so tamnišej part­neraj, Serbski institut a spěchowanske towar­stwo Domizniskeho muzeja Dešno, połnje na swoje nadawki koncentrować.