Němski přełožk Arnošta Mukoweje „Statistiki łužiskich Serbow“ steješe njedawno w srjedźišću zajimaweho wječora we Łazowskim Domje Zejlerja a Smolerja. Přełožer a wudawaćel Robert Lorenc je tam knihu wjace hač třiceći wopytowarjam předstajił.
Łaz (AK/SN). Za slědźenje wo serbskich stawiznach ma Mukowa „Statistika łužiskich Serbow“ wulki wuznam. To wuwědomichu sej wobdźělnicy čitanskeho wječora, jako rozłoži jim Robert Lorenc statistiku, kotruž bě přełožił. „Wažne je, zo maja wšitcy zajimcy, kotřiž tu bydla, přistup k serbskej wědźe. Tale kniha měła dźěl teje wědy być“, rjekny Robert Lorenc na naprašowanje předsydy Towarstwa za hajenje regionalneje kultury srjedźneje Łužicy Wernera Bejmy, čehodla je knihu wudał. Wona móhła při pytanju za serbskimi korjenjemi pozbudźeć a nastupajo mjena wsow a swójbow wažne pokiwy dawać. Chronisća a domizniscy slědźerjo móža z njej runje tak dźěłać kaž studenća a šulerjo.
