Nowe Slepjanske spěwarske

póndźela, 27. januara 2020
artikl hódnoćić
(0 )
Čłonojo Kóleska su sobotne předstajenje nowych Slepjanskich spěwarskich wobrubili.  Foto: Andreas Kirschke Čłonojo Kóleska su sobotne předstajenje nowych Slepjanskich spěwarskich wobrubili. Foto: Andreas Kirschke

Slepo (AK/SN). Towarstwo Kólesko roze­staja so dale zaměrnje ze zachowanjom a hajenjom slepjanšćiny. Za to steja tež ewangelske spěwarske „Něnter comy Boga chwalić“. „Je to přinošk k sylnjenju korjenjow a serbskeje identity. Zdobom móžemy z nimi tradiciju jutrowneho spěwanja dale wjesć“, podšmórny fararka Jadwiga Malinkowa na sobotnym předstajenju spěwarskich w Slepom.

232stronske wudaće wobsahuje kěr­lu­še, psalmy a modlitwy w Slepjanskej serbšćinje, runje tak kaž mału čitansku pomoc a rěčne pokiwy. Financowany bu spěwnik ze srědkow přirady za serbske naležnosće Ewangelskeje krajneje cyr­kwje Berlin-Braniborska-šleska Hornja Łužica, Załožby „Doma w Slepom, Rownom, Mułkecach“ a Slepjanskeje wosady. Zakład tworješe z lěta 1884 pochadźaca zběrka „Stare lube kěrluški Slěpjańskeje Wosady“ małobura Hanza Šymka. Wužiwali su tež nahrawanja z 1950tych lět, z kotrymiž běchu wašnje spěwanja dokumentowali. Dalše hódnotne žórło bě list Slepjanskeho wobsedźerja rězaka a spisowaćela Jakuba Lorenca-Zalěskeho z lěta 1925. W nim mjenuje wón dźewjeć typiskich Slepjanskich serbskich jutrownych pěsnjow.

Juliana Kaulfürstowa bě so wo přełožki postarała, dr. Hync Rychtaŕ je dokładnje korigowaše a Trjebinjan Dieter Redo je akterow poradźował. Gerald Schön měješe wobšěrne zhudźbnjenje kaž tež digitalizaciju melodijow na starosći, Jörg Tausch bě zamołwity za ilustracije. Za­korjenjene su spěwarske w Slepjanskej wosadźe. „Tu maja swoju płaćiwosć“, wu­zběhny tež superintendent Jan Malink.

wozjewjene w: Towarstwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND