Njebjelčicy (SN/MiR). Něšto dlěje hač lěto Serbski sejm mjeztym wobsteji, skonstituowany 17. nowembra 2018 w Slepom. Iniciatoram je wón prěnje demokratiske zastupnistwo Serbow. Jeho 24 zapósłancow stara so wot toho časa wo zajimy Serbow w Hornjej, srjedźnej a Delnjej Łužicy. Dźěl z nich bě wčera do Njebjelčic přijěł, zo bychu zhromadnje lětničku swjećili. Něhdźe 40 ludźi – zapósłancy, sympatizanća a dalši zajimcy – słyšeše spočatnje na gmejnskej žurli přednošk dr. Měrćina Wałdy. Wón zaběraše so z prašenjom, čehodla Serbja swój sejm trjebaja, a spominaše na spočatki zjawneje diskusije wo zastupnistwje Serbow jako korporacija zjawneho prawa. „Zo so němska politika tak mało wo hódnoty fungowaceje demokratije w Serbach starosći, je ćmowa perspektiwa.“ Hajko Kozel rozprawješe po tym wo zaměrje sejma, sobu- a samopostajowanje serbskeho ludu pohonjeć a namakać konsens mjez sejmom a Domowinu.