Budyšin (SN/JaW). Wobmjezowanje zjawneho žiwjenja koronapandemije dla staja mnohich před wulke wužadanja a zbudźa prašenja. Mjez druhim rozmysluja w Domowinskich župach a jim přisłušnych skupinach, kak lětsa z tak mjenowanej župnej pawšalu wobchadźeć, hdyž wšak wobmjezowanjow korony dla mnohe zarjadowanje přewjesć njemóžachu.

Ze zarjada Domowiny k tomu rěka, zo su srědki ze župneje pawšale zasadnje na lěto wjazane, za kotrež su přizwolene. Přiwšěm je tež třěšnemu zwjazkej wědome, „zo njebě lětsa ze znatych přičin móžno zarjadowanja kaž planowane přewjesć“, zwurazni na naprašowanje referent Domowiny za hospodarske a infrastrukturne naležnosće Pětr Brězan. „Zmóžnjamy tuž towarstwam, srědki za dalše rěč a kulturu spěchowace naprawy nałožić.“ To rěka, zo smědźa sej trěbny „material za serbske nałožki a podawki nakupować“. Srědki do přichodneho lěta přewzać pak prawniskich přičin dla móžno njeje. „Pjenjezy smědźa jenož za pěstowanje serbskeje rěče a kultury wudawać. Njeje-li wudawkow, dyrbja cyłki srědki zaso wróćić“, Brězan potwjerdźi.