Towarstwo Serbski kulturny turizm zaměrnje za cyłu Łužicu dźěła
Budyšin (SN/BŠe). Towarstwo Serbski kulturny turizm (SKT) swoju dźěławosć dale rozšěrja. „Koronapandemije dla gremije swoje posedźenja online přewjeduja, štož wjele wolóža. Tuž móžachmy na wjace wuradźowanjach přitomne być, štož nam hewak dołhich pućow dla móžno njebě“, rozprawja předsyda SKT Pětr Brězan. Towarstwo wšak skutkuje w Hornjej, srjedźnej a Delnjej Łužicy, hdźež wšelakore turistiske gremije swoje naprawy zwoprawdźa a poskitki šěrja. Hižo wjele lěta skutkuja w Leaderowym regionje Hornjołužiska hola a haty. „Tež w Leaderowym regionje Łužiska jězorina chcyli dźěłać. Zesylnić chcemy tež zhromadne dźěło z Marketingowej towaršnosću Hornja Łužica-Delnja Šleska.“ Tohorunja su zetkanja z dalšimi turistiskimi zjednoćenstwami a zwjazkami předwidźane.