Wotkrywaja sej mjeńšinowe kubłanje

srjeda, 20. oktobera 2021
artikl hódnoćić
(0 )
Wčera wopytachu wobdźělnicy kubłanskeje jězby SŠT danski gymnazij A. P. Møller-Skolen z jeho markantnej witanskej halu a biblioteku.  Foto: SŠT Wčera wopytachu wobdźělnicy kubłanskeje jězby SŠT danski gymnazij A. P. Møller-Skolen z jeho markantnej witanskej halu a biblioteku. Foto: SŠT

Budyšin/Schleswig (SN/JaW). 25 serbskich wučerjow a studentow wučerstwa, čłonojo a čłonki předsydstwa Serbskeho šulskeho towarstwa kaž tež kubłanska referentka Domowiny Katrin Suchec-Dźisławkowa wotkrywaja sej hišće hač do jutřišeho mjeńšinowe kubłanje Frizow a Danow w Južnym Schleswigu.

W srjedźišću kubłanskeje wuprawy SŠT, kotruž je sakske kultusowe ministerstwo financowało a krajny zarjad za šulu a kubłanje zhromadnje ze Serbskim šulskim towarstwom přihotował, steji wuměna nazhonjenjow mjez narodnymi mjeńšinami, předewšěm kubłanje nastupajo. Wšako zetkawaja so na wuprawje Serbja z Frizami a Danami w Němskej. Program zestajała je předsydka rady ­Załožby za serbski lud Susann Šenkec, ­kotraž w Južnym Schleswigu njedaloko Flensburga ze swójbu bydli a skutkuje. Wona serbsku delegaciju na kubłanskej jězbje přewodźa. „Nimo nastorkow za wuwučowanje serbšćiny a skrućenje našeje rěče na šulach dźe wězo tež wo wuměnu myslow mjez serbskimi wučerjemi a studowacymi wučerstwa wšelakich šulskich formow“, wuswětla předsydka SŠT Katharina Jurkowa.

wozjewjene w: Towarstwa
Prošu přizjewće so, chceće-li komentar podać

nawěšk