Wuknjacy z wosom šulow wobdźěli so na projekće

Wojerecy (KD/SN). Něhdźe 60 serbšćinu wuknjacych šulerjow 8. lětnika je zawčerawšim zahajenje šulerskeho projekta „Zetkanje ze Zejlerjom a Kocorom“ we wobłuku „Lěta Zejlerja a Kocora“ dožiwiło. Projektne dny so na zahrodźe, w bróžni a w sydarni domu Domowiny we Wojerecach wotměja. Zhromadny projekt hornjołužiskich župow Domowiny je Kamjenska župa „Michał Hórnik“ we wubědźowanju idejow Simul+ wuspěšnje zapodała. Dohromady chce so 220 šulerjow z wosom šulow z Handrijom Zejlerjom a Korlu Awgustom Kocorom hač do jutřišeho zeznajomić.