Předpisy spěchowanja towarstwow zaběraja Załožbu za serbski lud

Budyšin (SN/MkWj). Prěnja powěsć wo nowym rjadowanju nastupajo spěchowanje towarstwow w Sakskej bě šokowaca: Wot spočatka lěta płaća nowe směrnicy w Sakskej, po kotrychž dóstanu towarstwa spočatnje jenož hišće 40 procentow trěbnych srědkow, zbytk hakle po zakónčenju projekta (SN rozprawjachu). Nimo toho dyrbja nadrobny financny plan z dochodami a wudawkami cyłeho lěta za cyłkowne towarstwo a wotpowědny aktualny wućah wšitkich kontow projektoweho nošerja podać, chcedźa-li spěchowanske srědki za projekty dóstać.

Zamołwići běchu sej wot wšeho spočatka přezjedni, zo by tajke rjadowanje dźěło serbskich towarstwow w dalokej měrje wohrozyło, dokelž su na srědki takrjec hnydom pokazane, a nic hakle pozdźišo, myslimy jenož na lajske dźiwadłowe skupiny.