Mnichowski architektny běrow wčera dobyćerske wopismo přijimał

Budyšin (SN/at). Rainer Hofmann rěči wo „šarněrje“ a pokaza na rysowanku. W tutej funkciji widźi jednaćel běrowa bogevischs buero architekten & stadtplaner GmbH z Mnichowa foyer přichodneho Serbskeho centruma wědy na Lawskim arealu w naćisku ze swojeho domu. Mjez čitarnju Serbskeho instituta, wobłukom Serbskeho muzeja a płoninu pod hołym njebjom su Mnichowscy architekća foyer zaměstnili. A jemu su dalšu funkciji spožčili, tajku „šarněra“: za wotewrjenski čas zaruči přechod wot historiskich wrotow Stareje póstownje na Hošic hasu do namjetowaneho toroža na Lawskich hrjebjach. „To je jara kompleksny twarski nadawk. Smy šansu měli, něšto pospytać. A to w dźělu Němskeje, kotryž je nam skerje njeznaty“, přeradźi wón wčera popołdnju na žurli Serbskeho domu na prašenje našeho wječornika, što je běrow docyła pohnuł so na tymle wubědźowanju wobdźělić. Jeho wjeselo nad dobyćom bě derje widźeć.