Prezidij třěšneje organizacije na kónclětnym posedźenju w Kamjencu

Kamjenc (SN/mb). Poslednjej terminaj w lětušej protyčce Domowiny stej dźensniši wopyt kursistow „Zorja“ z rěčneho hnězda za delnjoserbšćinu pola serbskich institucijow w Budyšinje kaž tež serbske adwentne­ spěwanje w zetkawanišću Slepjanskeje ewangelskeje wosady. Wčera je so kónclětne posedźenje prezidija w Kamjencu wotměło. W Muzeju zapadneje Łužicy dr. Susanne Hozyna čłonow prezidija najprjedy po přehladce „Přiwěra a magija. Wustajeńca składnostnje 800. jubileja města Kamjenc“ wjedźeše.

Spočatk tydźenja je Lipšćanska uniwersita składnostnje posedźenja Rady za serbske naležnosće Sakskeje třěšnemu zwjazkej rjany hodowny dar wobradźiła: nowowusměrjenje Instituta za sorabistiku. Wjacore lěta bě předsyda Domowiny Dawid Statnik – z kritiku serbskich studentow w pozadku – zamołwitych napominał, zo měł so serbski profil zarjadnišća tak wožiwić, zo předewšěm nadawkej wukubłanja wučerskeho dorosta wotpowěduje. Nowy koncept žadanja spjelnja.