Dwě róčnicy stej dźěławosć Budyskeje župy „Jan Arnošt Smoler“ loni we wulkej měrje postajałoj: 125. posmjertne narodniny molerja Měrćina Nowaka-Njechorńskeho a 800. róčnica prěnjeho naspomnjenja wjeski Malešec.

Budyšin (SN/MiP). Składnostnje 125. narodnin Měrćina Nowaka-Njechorńskeho bě župa nimo spominanskeje swjatočnosće při jeho rowje w Hrodźišću w juniju spočatk julija wjetše zarjadowanje na žurli Serbskeho domu wuhotowała. Županka Leńka Thomasowa informowaše přitomnych wo prócowanju za zdźerženje doma wuměłca w Njechornju. Nimo toho wopytachu z pomocu techniki wirtuelny dom Njechorńskeho. Sobudźěłaćer Serbskeho instituta dr. Robert Lorenc předstaji digitalizowanje serbskeho kulturneho herbstwa z konkretnym přikładom.

W juniju je Budyska župa towaršnosć Carl Gustav Jung Sakska z.t. při zarjadowanju 2. sympozija wo łužiskich powěsćach podpěrowała. W „Domje tysac hatow“ w Stróži su so serbscy a němscy wobdźělnicy na wšelake wašnje z bajowymaj postawomaj zmijom a plonom zaběrali, kotrejž so tež w mnohich twórbach Měrćina Nowaka-Njechorńskeho jewitej.