Pjeć předstajenjow pasiona „Sćěhuj mje!“ na farskej łuce w Chrósćicach z něhdźe 4 000 přihladowarjemi bě jedyn z lońšich wjerškow skutkowanja Towarstwa Cyrila a Metoda (TCM).

Budyšin (SN). W dźesaćlětnym rytmusu předstajeja w Chrósćicach Jězusowe ćerpjenje, wumrěće a zrowastanjenje. Loni je při tym něhdźe 150 akterow na jewišću a dalšich 100 za nim sobu skutkowało. Předstajenja běchu w serbskej rěči, zdobom poskićichu simultany přełožk do němčiny. Wobdźělnikam kongresa Europasion zamołwići přełožk pasionskeho předstajenja samo hišće do dalšich rěčow zmóžnichu. Wot 11. do 14. septembra 2025 bě TCM hosćićel kongresa mjezynarodneho zhromadźenstwa Europasion. Prěni raz so kongres w Sakskej wotmě. Wobdźělnicy wopytachu město Budyšin, pomnik swjateju Cyrila a Metoda, Ralbicy a klóšter Marijina hwězda. TCM a jeho sekcija Chróšćanske pasionske zjednoćenstwo stej kongres za něhdźe 150 hosći z dwanaće krajow Europy wuhotowałoj a jim tež wosebitosće Serbow předstajiłoj.