Praha (SN/LuNo). Towarstwu přećelow Łužicy (SPL) je loni poradźiło, swoje financy konsolidować. To je za dalše skutkowanje w Serbskim seminarje trěbne. Porno předchadźacym lětam bě mjenje zajězdow Serbow do Prahi, město toho poby towarstwo husćišo w Serbach. Spočatk lěta je SPL swoje skutkowanje na přednošku w putniskej hospodźe w Chrósćicach předstajiło. K wjerškam lěta je wopyt 800. jubileja Chrósćic słušał. Dale je towarstwo nowy program za mjeztym hižo tradicionalny zajězd na serbske jutry přihotowało. Kopicu literarnych čitanjow a přednoškow je Milan Hrabal w Praze a tež w druhich čěskich městach wuhotował. Čłonojo towarstwa poskićichu nowe temy za přednošowanje: Ondřej Šrámek wo serbskich mytiskich bytosćach a přirunanju z čěskimi abo Martin Boukal wo wuwiću serbskeje hymny.