Klawsura Zwjazkoweho předsydstwa Domowiny wo dźěle gremija

Budyšin (SN/mb). Zo bychu so mjez sobu lěpje zeznali a so ze strukturami swojeje dźěławosće hłubšo zeznajomili, su so čłonojo Zwjazkoweho předsydstwa Domowiny (ZP) sobotu na šěsćhodźinsku klawsuru zešli. Kak móže so gremij ­mjenje z formalnymi wěckami zaběrać a wobšěrnišo bytostnym diskusijam wěnować, běše městopředsydźe dr. Hartmutej Leipnerej wažne prašenje. Po klawsurje je Serbskim Nowinam wobkrućił, zo bychu so w přichodźe snadź husćišo hač štyri króć wob lěto zetkawali, ale druhdy na krótše wuradźowanje. Na sobotnišim zeznaću su jeho wosebje mysle młodych čłonow ZP zajimowali.