AfD přeprošuje CDU a BSW
Młodźi ludźo AfD wolili
Wuradźuja wo prašenjach migracije
Berlin (dpa/SN). Zastupnicy amploweje koalicije SPD, Zelenych a FDP kaž tež CDU/CSU a zwjazkowych krajow su so dźensa w Berlinje zetkali, zo bychu wo konsekwencach smjertneho nadpada w Solingenje wuradźowali. Zakład je po informacijach zwjazkoweho nutřkowneho ministerstwa „wěstotny paket“ zwjazkoweho knježerstwa, kotryž běchu minjene tydźenja zdźěłali. W nim běchu rozmołwy mjez Zwjazkom a zwjazkowym knježerstwom připowědźili. Namjety politiskich stron knježerstwo wita.
Předsyda CDU Friedrich Merz je sej do zahajenja rozmołwow zasadne změny žadał. Najwažniša tema měło wobmjezowanje připućowanja być. Tole dźe jenož z wotpokazanjemi migrantow při mjezach Němskeje. Njeje-li koalicija zwólniwa wo tym rěčeć, „potom dalše posedźenja hižo njetrjebamy“, Merz rjekny.
Rěčnica knježerstwa Christiane Hoffmann hladajo na wuslědki warnuje: „Namjetuju, najprjedy raz wočaknyć. Hižo zwoprědka wulke wočakowanja formulować, njeje radźomne“, wona rjekny.
Volkswagen planuje pušćenja
Najwjetši awtotwarc Europy dyrbi lutować – dźěławi chcedźa wojować
Wolfsburg (dpa/SN). Połoženje pola najwjetšeho europskeho awtotwarca Volks-wagen so přiwótřa. We wobłuku lutowanskeho programa zamołwići centralneje marki VW nětko tež wjace njewuzamkuja, cyłe zawody zawrěć a ludźi pušćić, nawodnistwo koncerna zdźěla. Ze zawodnej radu wotzamknjene dojednanje wo zaručenju dźěłowych městnow su wupowědźili. Dojednanje je pušćenja ze zawodnych přičin hač do lěta 2029 wuzamknyło. Zastupnistwa dźěławych a dźěłarnistwa su zludani.
Z wida nawodnistwa dyrbja žro awtotwarca nuznje přetwarić, kaž rěkaše. „Tež zawrjenja zawodow awta produkowacych wobłukow njemóžemy w aktualnym połoženju hižo wuzamknyć.“ Nimo toho dotal planowany wottwar dźěłowych městnow přez starobne dźělne dźěło a wotnamakanja njedosaha, zo móhli planowane zaměry docpěć.
Słowa kaž worjech?
To a tamne (03.09.24)
Powostanki sławneje łódźe „Titanic“ rozpaduja. Tole dokumentuja wobrazy najnowšeje ekspedicije slědźerjow k podnurjenej łódźi w Atlantiskim oceanje. Tak je dźěl prědnjeho kónca łódźe wotpadnył. Dopokaz to přiběraceho rozpadowanja wocla w „njepřećelskej mórskej wokolinje“. „Titanic“ bě so 1912 po zražce z lodowcom podnuriła. Po dołhim pytanju běchu wrak 1985 něhdźe 3 800 metrow hłuboko w morju namakali.
Swój dotalny swětowy rekord při póžěranju hotdogow přetrjechił je Joey Chestnut z USA. Na wšěch 83 kołbaskow w całće je 40lětny w běhu dźesać mjeńšin w Las Vegasu zjědł. Dotalny rekord wučinješe 76 hotdogow. Jeho konkurent Takeru Kobayashi z Japanskeje je swój dotalny rekord tohorunja polěpšił, docpě pak „jenož“ 66 kołbaskow. Dobyćer móžeše myto 100 000 dolarow sobu domoj wzać.
Wola naslědnika Weselskeho
Berlin (dpa/SN). Najwyši organ Dźěłarnistwa lokomotiwnikow Němskeje GdL, tak mjenowana generalna zhromadźizna, je so dźensa w Drježdźanach zešła, zo by naslědnika wjelelětneho předsydy dźěłarnistwa Clausa Weselskeho wuzwoliła. Po 16 lětach na čole zastupnistwa lokomotiwnikow a mnohich dołhich tarifowych rozestajenjach woteńdźe 65lětny na wuměnk. Móžny naslědnik je dotalny městopředsyda Mario Reiß. Tón pochadźe runje tak kaž Weselsky ze Sakskeje.
Bamž na dołhu jězbu so podał
Rom (dpa/SN). Na najdlěšu wukrajnu jězbu swojeho zastojnstwa je so bamž Franciskus dźensa podał. 87lětna hłowa katolskeje cyrkwje chce přichodnych dwanaće dnjow štyri kraje juhowuchodneje Aziskeje a Oceaniskeje wopytać. K zahajenju wočakuja jeho w Indoneziskej, z wjace hač 240 milionami muslimow na wobydlerjach najbohatši muslimski kraj swěta. Dalše stacije su Papua-Nowa Guinea, Wuchodny Timor a Singapur.
Tež druhim popłatki skrótšić
Protestowacy sej dojednanjez Hamas žadaja
Tel Aviv/Gaza (dpa/SN). W Israelu statysacy ludźi protestowachu a sej žadachu, zo ma knježerstwo hnydom zrěčenje z islamistiskej Hamas wobzamknyć. Protesty su wot zahajenja wójny w Gazaskim pasmje drje najwjetše. Přičina toho su namakane ćěła šěsć zastajencow. Třěšny zwjazk dźěłarnistwow je dźensa ludźi ke generalnemu stawkej namołwjał, zo móhli wjace ćišća na šefa israelskeho knježerstwa Benjamina Netanjahuwa wukonjeć.
Při protestach w Tel Avivje a druhich městach kraja su wobdźělnicy z policistami wojowali. Kaž medije w Israelu rozprawjeja, su zastojnicy wjele ludźi zajeli. Dale organizatorojo zdźěla, je so jeničce w Tel Avivje 300 000 ludźi zešło. Oficialnych ličbow tuchwilu žanych njeje.
Zranjeni po ruskich nadpadach
Kijew/Moskwa (dpa/SN). Ruska je minjenu nóc znowa susodnu Ukrainu z trutami a raketami nadběhowała. W stolicy Kijewje staj so wobydlerjej zraniłoj, měšćanosta Witalij Kličko zdźěli. Na zapadźe města su wjacore wohenje wudyrili. Rakety su mjez druhim staciju podzemskeje železnicy wobškodźili.
Hórje trjechiło je město Sumy njedaloko ruskeje mjezy. Tam zličichu 18 zranjenych po ruskim raketowym nadpadźe. Rakety su wjacore bydlenske domy kaž tež kubłanišćo trjechili.
Mjeztym Ruska ze swojej ofensiwu w kónčinje wuchodneho ukrainskeho Donjecka dale pokročuje. Po informacijach ruskeho zakitowanskeho ministerstwa w Moskwje su ruske jednotki wjes Wyjimka na sewjeru Donbasa zdobyli. Ukrainski generalny stab wojowanja wokoło wsy wobkrući. Nadběhi su pak pječa wotwobarali. Wyši rozkazowar ukrainskeho wójska Olexander Syrskyj přizna, zo je połoženje na fronće wobćežne, dokelž su ruske jednotki po ličbje wojakow a po mnóstwje wojerskeho materiala sylniše.
Strony amploweje koalicije słabe
Wólby krajneju sejmow w Sakskej a Durinskej nowe połoženje wunjesli
Drježdźany (dpa/SN). Po wólbach krajneho sejma pytaja w Sakskej nětko nowe nošne knježerstwo za přichodnych pjeć lět. Ministerski prezident Michael Kretschmer, ze swojej CDU najsylniša móc w kraju, při tym koaliciju ze Zwjazkom Sahry Wagenknecht (BSW) njewuzamkuje. „Njejsym sej to přał, ale dyrbju realitu na wědomje brać“, rjekny politikar CDU dźensa rano w rozhłosu.
Sobupředsydka BSW, Amira Mohamed Ali, widźi samo zhromadnosće ze sakskej CDU z Michaelom Kretschmerom. Nastupajo prašenje dodawanja brónjow za Ukrainu a wotpokazanja nastajenja nowych raketow USA w Němskej je wona „podobne signale Kretschmera słyšała“.
Kretschmer so jej znajmjeńša w tutym prašenju spřećiwja, pokazujo na wěstotne zajimy Europy.
