Ruscy hooliganojo zajeći
Köln (dpa/SN). Po wčerawšim brutalnym nadpadźe ruskich hooliganow na španiskich turistow w Kölnje je policija wšitkich šěsć skućićelow zajała. Nětko chcedźa pozadki ataki z dwěmaj zranjenymaj wujasnić, rěčnik policije zdźěli. Kölnske statne rěčnistwo tuchwilu pruwuje, hač sej jastwo za zajatych nježada. Mužojo běchu z ćahom na dompuću z europskich koparskich mišterstwow w Francoskej. Policija pruwuje, hač běchu woni tež na tamnišich namócnosćach wobdźěleni.
Müller: Prěnja kročel
Berlin (dpa/SN). Wo rozdźělenju kóštow za zaměstnjenje a zastaranje ćěkancow w Němskej so Zwjazk a kraje dale wadźa. Wčera běchu so w někotrych dypkach dorěčeli, cyłkowne dojednanje pak hišće docpěte njeje, Berlinski knježacy měšćanosta Michael Müller (SPD) zdźěli. Tak Zwjazk mjez druhim přilubi, zo chcył na tři lěta kóšty komunow za připóznatych ćěkancow přewzać. Müllerej je tole „prěnja kročel“. Knježerstwo dyrbjało spóznać, zo zwjazkowym krajam w prašenju ćěkancow skutkownišo pomha.
Kritizuja twar awtodróhi
Pólski statny prezident Andrzej Duda (naprawo) wopyta dźensa w ...
Wulka Britaniska žaruje wo zapósłanču
Zwjazkowa rada rozsud přestorčiła
Hišće raz wjele dešća
To a tamne (17.06.16)
Fatalne misnjenje je so při twarskich dźěłach w Berlinje-Kreuzbergu stało. Jako w nowym twarjenju betonowy wjerch wuliwachu, wjetše mnóstwo jara židkeho betona sćěny pódlanskeho stareho domu předrě a tam wjele škody načini. Dźesać wobydlerjow domu dyrbjachu ewakuować, policija zdźěli. Wohnjowa wobora: „Tajke něšto njejsmy hišće dožiwili.“
Při pospyće, prostitutku wobkradnyć, je muž w Schwerinje z woknom ćeknyć spytał. Při tym so 32lětny ćežko zrani, byrnjež wokno jeno połtřeća metra wysoko nad dnom było. Jeho dyrbjachu do chorownje dowjezć. Po tym zo bě minjenu nóc pola woneje žony był, hrabny sej jeje pjenjezy a spěchaše k durjam. Dokelž žona jeho zadźerža, muž z woknom skoči. Nětko dyrbi so padustwa dla zamołwić.
Mócne krawale
Lille (dpa/K/SN). W Lillu su wčera znowa hłownje jendźelscy fanojo kopańcy krawale naškarali. 36 z nich policija zaja, 16 lóšo abo ćešo zranjenych do chorownjow dowjezechu. Wěstotne mocy dyrbjachu hnydom wjacore razy ze sylzopłunom a gumijowymi retlemi zakročić. Krawalnicy běchu do Lilla ekstra ze 40 km zdaleneho Lensa přjěli, hdźež hraje dźensa Jendźelska přećiwo Waliziskej.
Festerling wuzamknjena
Drježdźany (dpa/SN). Łamk w nawodnistwje Pegidy je nětko oficialny: Organizatorojo přećiwo wukrajnikam a islamej so měrjaceho hibanja su jednu z nawodnych wosobinow, Tatjanu Festerling, z towarstwa Pegida wuzamknyli. 52lětnej, kotraž bě loni k wólbam wyšeho měšćanosty nastupiła, wumjetuja towarstwu škodźace zadźerženje, Pegida w interneće zdźěla. Festerling bě so mjez druhim spjećowała, manuskripty swojich narěčow zamołwitym předpołožić. Dowuzamknyć chcedźa ju na přichodnej towarstwowej zhromadźiznje.
Podhladne awta zwěsćili
