Stawizniske popołdnjo zajim budźiło
Něhdźe 60 zajimcow sćěhowaše wčera přeprošenje Budyskeje župy „Jan Arnošt Smoler“, Rakečanskeho stawizniskeho towarstwa RAK a Domowinskeje skupiny Komorow/Trupin/Rakecy na stawizniske popołdnjo w Rakečanskej Pawołskej šuli.
Rakecy (SN/CoR). „Runje za našu gmejnu ma tajke zarjadowanje wosebity wu- znam, dokelž wuwědomja nam zhromadne korjenje němskich a serbskich wobydlerjow. Bych so wjeselił, hdyž dalše slěduja“, podšmórny Rakečanski wjesnjanosta Swen Nowotny (CDU) na kóncu stawizniskeho popołdnja. Na nim přednošowachu předsydka stawizniskeho towarstw RAK Annemarie Rentsch, dr. Edmund Pjech a dr. Susanne Hozyna ze Serbskeho instituta přitomnym w kopatej połnej awli ewangelskeje šule.
Pjećo so požadali
Budyšin (SN/JaW). Pjeć wosobow prócuje so wo městno direktora Załožby za serbski lud. Mjez požadarjemi je tež žona, wobkrući naměstnica direktora Załožby za serbski lud Michaela Mošowa.
Załožbowy zarjad pyta tuchwilu poradźowansku firmu, kotraž ma kmanosće požadarjow za direktorske městno pruwować. „Hač k přichodnemu wuradźowanju załožboweje rady 24. nowembra w Podstupimje ma poručenje předležeć, kotry kandidat, kotra kandidatka abo kotři kandidaća su za poziciju wosebje kmani“, praji Mošowa. K tomu přewjedu tež wosobinske rozmołwy. „Jako wupisar móžemy so na nich wobdźělić, štož chcemy wužić. Zastupjerka Zwjazka a zastupjer Braniborskeje w załožbowej radźe kaž tež předsyda rady Jan Budar su hižo signalizowali so wobdźělić chcyć“, Michaela Mošowa potwjerdźi. Hač so załožbowa rada hižo na nowemberskim posedźenju na noweho direktora abo direktorku dojedna, njeje dotal jasne.
Městno direktora załožby dyrbjachu znowa wupisać, dokelž njebě so jeje rada w prěnim přeběhu w aprylu na žanoho kandidata dojednała.
Přihotuja domchowanku w Krabatowym młynje
Čorny Chołmc (UH/SN). Z domchowanku dožiwi Čornochołmčanski Krabatowy młyn přichodny kónc tydźenja jedyn z wjerškow w běhu lěta. Hižo pjaty raz podpěruja jón šulerjo Wojerowskeho powołanskošulskeho centruma. Wčera zhotowichu tam mjez druhim dźěle za wulku žnjensku pyramidu, kotraž je stajnje atraktiwne srjedźišćo domchowanki.
Nimo najwšelakorišich poskitkow regionalnych specialitow čaka na wopytowarjow wotměnjawy program. Sobotu wot 11 hodź. dožiwja woni spěwy a reje z Krabatoweho musicala, wot 14 hodź. Chróšćanskich muzikantow a po nimi Židźinsku dźěćacu rejwansku skupinu. Njedźelu wustupitaj mjez druhim w 13 hodź. spěwytwórc Bernd Pittkunings a w 15 hodź. delnjoserbske drastowe towarstwo Pśěza. Sobuwuhotowar domchowanki je Wojerowska Domowinska župa „Handrij Zejler“.
Saksku stolicu a towarstwo Stup dale wopytali
Drježdźany (kl/SN). Budyska Domowinska župa „Jan Arnošt Smoler“ je minjenu sobotu swoju lětušu kubłansku jězbu přewjedła. Dohromady 46 čłonow jednotliwych skupin a towarstwow župy poda so do Drježdźan. Prěnja stacija w sakskej stolicy bě Dwórska cyrkej. Tam zhonichu wobdźělnicy wo stawiznach Božeho domu, wo kralowskim dworje a wo najwjetšim wołtarnym wobrazu Němskeje.
Jan Brězan z Drježdźan, kiž bě Domowinjanow z Łužicy witał, rozprawješe jim wo stawiznach města a wo serbskim žiwjenju w Drježdźanach. Wobdźělnicy zhonichu, zo maja tam ekumenisku skupinu. Štyri króć wob lěto swjeća zhromadnu nutrnosć, dwójce ewangelsku a dwójce katolsku, a to w cyrkwi swjateho Józefa. W Dwórskej cyrkwi je kapała serbskeho biskopa, swjateho Bena, a tam je tež jeho mitra widźeć. Dale zhonichu skupinarjo wo zbóžnym Alojsu Andrickim, kiž je w Drježdźanach jako kapłan spomóžnje skutkował.
FUEN přihotuje so na wólby
Federalistiska unija europskich narodnych mjeńšin přihotuje personalne změny na čole organizacije, wšako wólbna doba wuběži, a na klětušim kongresu we Wrócławju budu wólby.
Flensburg/Budyšin (SN/at). Klětuši kongres Federalistiskeje unije europskich narodnych mjeńšin (FUEN) budźe w pólskim Wrócławju. Delnjošleska metropola je zhromadnje z baskiskim městom San Sebastiánom europska kulturna stolica 2016. Najebać bohaty kulturny poskitk na kromje kongresa maja wobdźělnicy wo přichodnej zestawje dźěłowych gremijow rozsudźić.
„Wólbna perioda so klětu zakónči. Na delegatnej konferency wotměja so potom turnusowe nowowólby prezidenta a wiceprezidentow. W tymle zwisku je sej prezidij FUEN na swojim njedawnym posedźenju w Flensburgu wuwědomił, zo rjad staršich ludźi za funkciju znowa k dispoziciji njeje“, rjekny tuchwilny wiceprezident FUEN a jednaćel Domowiny Bjarnat Cyž našemu wječornikej.
Kulturny turizm na prawym puću
We wobłuku móžnych hospodarskich srědkow wokrjes Sprjewja-Nysa „wuwiće muzejoweje krajiny spěchuje“. Takle je to w preambli spěchowanskich směrnicow wokrjesa zapisane.
Slepo (SN/mwe). Kaž towarstwo Serbski kulturny turizm w swojim septemberskim informaciskim łopjenu zdźěla, słuža spěchowanske srědki wokrjesa hromadźenju, zachowanju a posrědkowanju regionalnych kulturnych hódnotow a přinošuja zdobom k wutworjenju regionalneje identity a domizniskeho wědomja. Tak spěchowaše wokrjes Sprjewja-Nysa po swojich směrnicach tež projekt „muzejoweje nocy“, kotraž wotmě so 11. septembra w Zabrodskim muzeju jutrownych jejkow a w Dešnjansko-Strjažowskim domizniskim muzeju.
Serbske temy w srjedźišću stali
Rudolstadt (SN/JaW). Wjacore serbske temy stejachu kónc tydźenja na hłownej zhromadźiznje němskeje sekcije Mjezynarodneje rady za organizowanje folklornych festiwalow a ludoweho wuměłstwa (CIOFF) w Rudolstadće w srjedźišću. Kaž zdźěli referent Domowiny za kulturu a wukraj Clemens Škoda, kiž je ze sobudźěłaćerjom SLA Tobiasom Ruchu a štyrjomi čłonami Slepjanskeho folklorneho ansambla Serbow zastupował, su tam folklorny ansambl Slepo oficialnje jako noweho čłona CIOFF přiwzali. Rozsud za přiwzaće bě jednohłósny. Delegatam předstaji serbske kulturne ćěleso jeho předsyda Wolfgang Kotisek.
19 młodźencow wo superkokota so wubědźowało
Žylow (HA/SN). Wulki serbski spektakl Delnjeje Łužicy dožiwić móžachu ludźo sobotu w Žylowje, w měšćanskim dźělu Choćebuza. Domowinska župa Delnja Łužica wuhotowaše zhromadnje z młodźinskim aktiwom swój mjeztym hižo 16. superkokot. Na nim wobdźěli so 19 młodźencow, kotřiž běchu při lětušim łapanju kokota w jednotliwych wsach wubědźowanje wo najwušiknišeho jěcharja dobyli. Woni nastupichu nětko wo wulce požadany titul superkokota. Wjace hač tysac přihladowarjow zbliska a zdaloka na znate jěchanske zarjadowanje přichwata. Kralow přewodźachu kralowny w pyšnej serbskej drasće.
Dobył je wubědźowanje na kóncu Rico Noak z Běłeje Gory, kiž smě so wotnětka z čestnym titulom superkrala lěta 2015 pyšić, znajmjeńša hač do klětušeho superkokota. Druhe a třeće městno wobsadźištaj Tobias Schönemann ze Žylowa, kiž bě hižo lońši superkokot dobył, a Stefan Andreas z Bórkowow. Na wječornym swjedźenskim balu přepodachu młodźencam čestne wopisma.
