Barley posudk wotpokazuje
Berlin (dpa/SN). Zwjazkowa ministerka za justicu Katarina Barley (SPD) dwělomne poručenja poradźowanskeho gremija zwjazkoweho knježerstwa k bydlenjotwarskej politice wotpokazuje. Wědomostna přirada hospodarskeho ministerstwa je so wčera w posudku za to wuprajiła, socialneho bydlenjotwara so w dalokej měrje wzdać. Barley ma za „njezamołwite“, zo wědomostnicy přećiwo socialnemu bydlenjotwarej argumentuja. Wona chce, zo stat wjace pjenjez za nowe bydlenja nałoži, zo bychu podruže zapłaćomne byli.
Maas pojědźe do Turkowskeje
Berlin (dpa/SN). Zwjazkowy wonkowny minister Heiko Maas (SPD) pojědźe w septembru do Turkowskeje, zo by wopyt prezidenta Recepa Tayyipa Erdoğana w Němskej přihotował. Po informacijach powěsćernje dpa su 5. a 6. septembra wjacore politiske terminy w Ankarje planowane. Nimo toho chce so Maas na swjatočnosćach 150. jubileja němskeje šule w Istanbulu wobdźělić. Erdoğana wočakuja potom 28. septembra w Berlinje.
Merkel nadźije wosłabja
Hoberski lěsny woheń tuchwilu južnje Berlina zachadźa. Płomjenja ...
Rozjimujadźěło policije
Drježdźany (dpa/SN). Po dwělomnym postupowanju policije přećiwo žurnalistam sćelaka ZDF w Drježdźanach chcychu so sobudźěłaćerjo wusyłanja „Frontal 21“ dźensa z nawodnistwom policije w Drježdźanach zetkać. Policajska direkcija bě jich přeprosyła. Přiwšěm njebě jasne, hač so wobdźělnicy po tym k wuslědkam rozmołwy wupraja.
Při protestach w zwisku z wopytom zwjazkoweje kanclerki Angele Merkel (CDU) minjeny tydźeń w Drježdźanach bě so demonstrant werbalnje do žurnalistow dał a jim chłostajomny njeskutk wumjetował, dokelž běchu jeho filmowali. Na to policija žurnalistow kontrolowaše a je jim tak dlěje hač poł hodźiny dźěło znjemóžniła. Pozdźišo so wukopa, zo je demonstrant sobudźěłaćer krajneho kriminalneho zarjada Sakskeje. Widejo wo podawku so w interneće spěšnje rozšěrjowaše a je mjeztym wšoněmsku debatu wo haćenju žurnalistiskeho dźěła přez policiju zbudźił.
Sakski nutřkowny minister Roland Wöller (CDU) wčera w nutřkownym wuběrku krajneho sejma přilubi, podawk wobšěrnje wujasnić.
To a tamne (24.08.18)
Płunowy a borzdźidłowy pedal zaměnił je 76lětny w poruhrskim Bergkamenje. Z wotmachom jědźeše tuž ze swojim awtom do zahrodoweho centera, ale so na zbožo jeno snadnje zrani. 50lětnu žonu w centeru su lětace škleńčane črjopy tohorunja zranili. Muž bě při zaparkowanju před wobchodom pedalej zaměnił, do wukładneho wokna zrazył a hakle 25 metrow dale stejo wostał.
Kupnicoweho detektiwa při kradnjenju lepili su w badensko-württembergskim Breisachu. Přistajeny wobchoda bě jeho wobkedźbował, jako tworu z regala wza a do zaka tykny. Zapakowanje ćisny do wotpadkoweho bowa. Přiwołana policija muža kontrolowaše a namaka w jeho awće wjacore kradnjene wěcy. Detektiw, kiž ma padustwam poprawom zadźěwać, je prawdźepodobnje tež w dalšich wobchodach kradnył. Jemu hrozy pušćenje.
Wólbny bój z kubłanskej temu
„Wjedźemy wólbny bój z kubłanskej temu“, potwjerdźa předsyda towarstwa Pónaschemu Uwe Gutšmidt z widom na wólby Serbskeho sejma. Tema dótka so planowaneje noweje cyłkowneje šule z abiturnym schodźenkom w nošerstwje wokrjesa w Gołkojčanskim wjesnym dźělu Gogolowku-Haninym dworje (Klein Gaglow-Annahof).
Bórkowy (SN/at). Ćežki bě bój wo nowu cyłkownu šulu z abiturnym schodźenkom w juhozapadnym dźělu wokrjesa Sprjewa-Nysa. Mjeztym je kraj Braniborska předewzaću přizwolił. Stejnišćo w Gogolowku-Haninym dworje mjenuje wokrjesny sejmik w Baršću we wčera schwalenym wobzamknjenju „předstajomnu wariantu zwoprawdźenja“.
Dalše mjezsobne cła
Washington/Peking (dpa/SN). Wikowanska zwada mjez USA a Chinu je nowy schodźenk eskalacije docpěła. Po tym zo bě Washington minjenu nóc dalše cła za twory z Chiny w hódnoće 16 miliardow wurow wukazał, je China dźensa tworam z USA cła w samsnej wysokosći napołožiła. China dyrbi „trěbny napřećiwny nadběh“ přewjesć, rěčnik wikowanskeho ministerstwa w Pekingu zdźěli. Nimo toho chce China Swětowu wikowansku organizaciju informować.
BUND chcył komisiju wopušćić
Berlin (dpa/SN). Hladajo na planowane pušćenje štomow přez energijoweho zastaraćela RWE w Hambachskim lěsu je wobswětoškitna organizacija BUND hrozyła, zo tak mjenowanu wuhlowu komisiju wopušći. Ta chcyše so dźensa znowa schadźować. BUND je ze swojim předsydu Hubertom Weigerom w gremiju zastupjeny. Mjeztym je RWE pušćenje štomow za rozšěrjenje brunicoweje jamy jako „nuznje trěbne“ zakitował.
Kónc za halogenowe lampy
Na wupředatej koncertnej žurli Zhorjelskeje piwarnje Landskron je ...
Wuchadźišćo porno lětu 2014 njezměnjene
Wojerec/Budyšin (SN/at). Delegaća zjězda sakskeje Lěwicy rozsudźa sobotu we Wojerecach wo procedurje k nominaciji krajneje lisćiny strony za klětuše wólby sakskeho sejma. Při tym maja znowa naležnosć na blidźe, z kotrejž dyrbjachu so hižo w aprylu 2014 zaběrać: zaměstnjenje wot Serbskeje Lěwicy namjetowaneje wosoby na wjele lubjacym lisćinowym městnje. Ta chcyše zaručić, zo přisłuša po wólbach Serb abo Serbowka frakciji Lěwicy. Zjězd njeje namjet serbskich lěwicarjow tehdy sćěhował.
Po swojim na to zawjedźenym pruwowanju krajna změrcowska komisija strony poruči, zo Serbska Lěwica, wustawkowa komisija a dźěłowa skupina wólby zhromadnje spomóžny puć namakaja, zo bychu mjeńšinowe prawa při nastajenju kandidatow za krajne wólby w Sakskej zaručili. K tomu njeje dóšło a połoženje zdawa so nimale samsne kaž 2014.
Ministerka žada sej wujasnjenje
Drježdźany (dpa/SN). Zwjazkowa justicna ministerka Katarina Barley (SPD) je sej po wozjewjenju brizantnych nadrobnosćow w zwisku z postupowanjom policije přećiwo reporteram sćelaka ZDF na kromje prawicarskopopulistiskeje demonstracije w Drježdźanach spěšne a dokładne wujasnjenje žadała. „Podawki su přičina so starosćić a zamołwići w Sakskej měli je wobšěrnje wujasnić“, rjekny politikarka powěsćerni dpa. Do toho bu znate, zo bě wjele kritizowane zasadźenje policije přećiwo žurnalistam sobudźěłaćer sakskeho kriminalneho zarjada zawinił, kiž bě so we wólnym času na demonstraciji přećiwo islamej a wukrajnikam měrjaceho so hibanja Pegida wobdźělił. Muž bě team ZDF werbalnje nadběhował a so filmowanju wobarał. Na to policisća reporterow kontrolowachu a su jim tak najebać protest dlěje hač poł hodźiny dźěło znjemóžnili.
Tež serbske wobsahi zapřijate
Wjesne kónčiny tworja jedne ćežišćo strategije sakskeho knježerstwa
Drježdźany/Budyšin (SN/BŠe). Nimo městow tež wjesne kónčiny k dobremu wuwiću Sakskeje přinošuja. Runje wone su wažny region, wšako bydli tam połojca ludźi zwjazkoweho kraja, kotřiž maja mnohe talenty, ideje a so angažuja. Tež předewzaća z wjele dźěłowymi městnami su na wsach zasydlene. To su firmy, kaž na přikład Trumpf we Wjazońcy. Zo měli potenciale wjesnych kónčin dale spěchować, je tuž bytostne.
Minjeny tydźeń je sakski ministerski prezident Michael Kretschmer (CDU) strategiju za wuwiće wjesnych kónčin pod hesłom „Wšelakorosć dožiwić – Přichod zawěsćić“ w Limbachu-Oberfrohnje předstajił. 143 stron wopřijacy dokument wopisuje najwšelakoriše ćežišća.
Digitalizacija a wutwar spěšneho interneta stej wažnej faktoraj wuspěšneje dźěławosće. Mjez cyłkownje 13 wokrjesami Sakskeje zaběra Budyski tuchwilu 8. městno, hdźež je spěšnosć 50 megabitow na sekundu zaručena. Wulki zaměr swobodneho stata je, zo ma kóžda wjes přistup k spěšnemu internetej dóstać.
