Santiago de Chile (dpa/SN). Sakska wabi wo studentki a studentow z Chile. Za to su we hłownym měsće kraja wědomostny zwjazowanski běrow wotewrili. Z jeho pomocu chcedźa młodych ludźi w kraju za studij na wysokich šulach w swobodnym staće zdobyć. Podobne běrowy maja hižo w Taiwanje, Uzbekistanje, Vietnamje, Mongolskej a Indiskej.

Nimo zaměrneje akwizy studentow a z tym potencielnych dźěłowych mocow za Saksku słuša tež akademiska wuměna mjez slědźerskimi zarjadnišćemi a wysokimi šulemi Sakskeje a Chile k nadawkam běrowa. Běrow ma mjeno Saxon Science Liasion Office. „Potencial młodych ludźi w Chile, kotřiž móhli so bjez wulkich komplikacijow wo studij w Sakskej požadać, je wulki. Přičina za to su snadne rěčne barjery, wšako nawuknu mnozy młodźi ludźo tu němčinu“, rozkładuje wědomostny minister Sebastian Gemkow. Běrow ma nimo toho za cyły region wužitny być. Wědomostne ministerstwo dale wo tym informuje, zo je hižo nětko něhdźe 50 kooperacijow mjez wysokimi šulemi w Sakskej a Chile.

Berlin/ Drježdźany (dpa/SN). Němska wobswětowa pomoc (DUH) je sakske krajne knježerstwo přewjele słužbnych awtow dla, kotrež wobswěće škodźa, kritizowała. Awta kabineta wustorča přerěznje 165 gramow CO2 na kilometer. Přirunujo z druhimi zwjazkowymi krajemi steji Sakska z tym na dźewjatym městnje. Najlěpši přerězk maja Berlinscy politikarjo z 102 gramami na kilometer. Najšpatnišo je wobswětowa pomoc Mecklenburgsko-Předpomorsku pohódnoćiła. Tam wustorča awta přerěznje 190 gramow CO2 na kilometer. W Saksej wustorčitaj awće justicneje ministerki Constanze Geiert (CDU) z 62 gramami a wobswětoweho ministra Georga-Ludwiga von Breitenbuch (CDU) z 65 gramami CO2 na kilometer najmjenje. Najwjace CO2 wustorčitaj awće financneho ministra Christiana Piwarza a šefa statneje kenclije Andreasa Handschuha (wobaj CDU). Awto ministerskeho prezidenta Michaela Kretschmera (CDU) je z 167 gramami CO2 na kilometer na pjatym městnje w Němskej.

Koalicija hadruje so wo powyšenju dawkow za bohatych

Berlin (dpa/SN). Wosrjedź lěćneje přestawki so čorno-čerwjena koalicija znowa wadźi. Wjacori politikarjo unije su namjet finančneho ministra Larsa Klingbeila (SPD) wotpokazali. Tutón bě namjetował, zo staćanam, kotřiž wjele zasłuža a wjele pjenjez maja, wjace dawkow nabrěmjenja. Politikarjo SPD jemu na druhim boku přihłosowachu a wuprajichu so za to, zo wjace dawkow pola bohatych za financowanje mjenje dawkow pola małych a mjeńšich zasłužbow zasadźuja. Generalny sekretar SPD, Tim Klüssendorf, rjekny, zo je Němska na poslednim městnje w europskim přirunowanju hladajo na dawki za namrěwstwo miliardow a zamóženjow. „W Němskej płaći tón, kiž dźěła 40 hodźinow wob tydźeń jako wučerka abo hladarka chorych, zdźěla wjace dawkow, hač něchtó, kiž je 400 bydlenjow na najlěpšim městnje zdźědźił.“

Je dźeń a wjac swjatočnych proklamacijow wo tym, kak wažnej serbšćina a dwurěčnosć stej. Tež z erta ludźi, kotřiž su – hustodosć tež powołansce – lětdźesatki ze Serbami w zwisku, ale nažel kmani njejsu, w bjesadźe tři serbske sady rjec. To je kaž multikulti-wuznaće pozdatnje doprědkarskich ludźi, kotrychž realna swětawotewrjenosć so wšědny dźeń we wopytach eksotiskich hosćencow a w tym wotbłyšćuje, zo jim rjedźerka z wukraja za tuni fenk domjacnosć wobstaruje. Ćim drohotniši je angažement ludźi, kotřiž bjez wulkeho patosa a moraliskeho wupěranja prosće činja: na přikład so swěru na serbsku konwersaciju zetkawaja, zo bychu so rěčnje kubłali a z partnerom, dźěćimi a druhimi derje serbowali. Ličby su wšojedne, 15 ludźi z jasnym wědomjom bóle pomha hač 1 500, kotřiž njewědźa, štož chcedźa. Takle móhło w Slepjanskim regionje ze spočatnych 15 w běhu generacije 150 slepjansce rěčacych wurosć. Daj Bóh zbožo po tutym puću! Marcel Brauman