To a tamne (26.02.25)
Pawk je w lětadle španiskeho lětarskeho předewzaća Iberia pilota kusnył. Muža dyrbjachu z medikamentom lěkować, tak španiske medije rozprawjeja. Pilot so spěšnje zaso zhraba a mašinu bjez problemow přizemi. Pawk so zminy. Tuž ani njewědźa, wo kotru družinu so jedna. Lětadło su hnydom wurjedźili. Fachowcy na to tukaja, zo je pawk na lětanišću w Casablance w Marokku do mašiny zalězł.
Dospołny wupad miliny je Chile zlemił. Něhdźe 98 procentow wšěch domjacnosćow bě wčera potrjechenych. Knježerstwo kraja we łaćonskej Americe je na to nuzowy staw wukazało. Potrjechena kónčina je dobrych 3 000 kilometrow dołha. Policija so na ćmowych dróhach wo to staraše, zo njeby nichtó chaos znjewužiwał. Mjeztym su milinu krok po kroku zaso připinyli. Pječa je wažny milinowód wupadnył, kotryž wšón kraj zastaruje.
Serbsku rěč na Youtube!
Mjezynarodna konferenca zaběra so ze starosćemi mjeńšinow
Paris (SN/MiR). Rěčna technologija za mjeńšinowe rěče je tema mjezynarodneje konferency, kotraž so wot wčerawšeho do jutřišeho w Parisu wotměwa. Z boka Serbow wobdźělitaj so na njej Ivan Kraljevski, sobudźěłaćer Fraunhoferoweho iinstituta w Choćebuzu a Daniel Zoba, społnomócnjeny Załožby za serbski lud za digitalizaciju. Hłowny wobsah wuradźowanjow je prezentacija aktualneho stawa digitalneje rěčneje technologije za mjeńšiny. Kraljevski a Zoba staj mjez něhdźe 300 akterami. Něhdźe połsta z nich předstaja jadriwje nałožowanu rěčnu technologiju z posterom. „Pytnjemy, zo njejsu rěčne technologije, kaž je wulke rěče wužiwaja, za mjeńšinowe rěče hišće dosć wuwite“, Zoba rozłoži. K tomu słušeja spóznawanje, přełožowanje a předčitanje rěče abo tež wužiwanje KI-modelow. Druhdy pak pobrachuja mjeńšinam móžnosće, sej to same nadźěłać. To ma wuskutki na dalše wuwiće a wužiwanje mjeńšinowych rěčow na wšelakich runinach, nic jeničce na ryzy technisku. Přičiny su wočiwidne.
Němske hospodarstwo słabnje
Wiesbaden (dpa/SN). Słaby eksport a woteběraca produkcija awtow a mašinow hospodarstwo Němskeje dale poćežuja. Štwórty kwartal 2024 je nutřkokrajny bruttoprodukt z teje přičiny wo 0,2 procentaj woteběrał, zwjazkowy statistiski zarjad we Wiesbadenje zdźěla. Nimo toho su zawody tež mjenje nowych mašinow, nastrojow a jězdźidłow kupowali, zarjad zwěsća. Dźakowano miłemu wjedru su na twarnišćach wjace inwestowali. Koaliciske rozmołwy we Wienje
Wien (dpa/SN). W Awstriskej zdawaja so koaliciske jednanja mjez konserwatiwnej ÖVP, socialdemokratiskej SPÖ a liberalnej stronu Neos na dobrym puću być. Wobdźělnicy dźěłaja konstruktiwnje na zhromadnym knježerstwowym programje, we Wienje rěkaše. W běhu tydźenja chcedźa program předstajić. Strony běchu loni nazymu hižo raz podarmo wo koaliciji rěčeli. Po tym bě wólbny dobyćer, prawicarska FPÖ, spytała, z ÖVP knježerstwo zestajeć. Tež to je zwrěšćiło.
Minister w Guantánamo
Po wšěm swěće so wěriwi tele dny za schorjeneho bamža ...
Macron chwali dźěło Trumpa
Nowy pospyt za škit přirody
Rom (dpa/SN). Štyri měsacy po zwrěšćenej mjezynarodnej konferency za škit přirody su so zastupnicy 200 krajow dźensa znowa w Romje zešli. W nowembru bě so 16. konferenca UNO k biologiskej mnohotnosći w Kolumbiskej bjez dojednanja skónčiła. Wosebje financowanje a přesadźenje staršich wobzamknjenjow bě zwadu zbudźiło. Hłowny zaměr konferency je, mnohotnosć zwěrjatow a rostlinow na swěće zachować.
Za nowy pospyt maja delegaća hač do zajutřišim, štwórtka, chwile. Mjez wobdźělnikami je tež delegacija Němskeje. USA njejsu porno tomu wjace zastupjene. Hižo do nawróta Donalda Trumpa jako prezident běchu USA jenož hišće jako wobkedźbowarjo pódla.
UNO z rezoluciju na dobro Ruskeje
New York (dpa/SN). Bjezstrašnostna rada UNO je Moskwje přichilenu rezoluciju schwaliła, kotruž bě knježerstwo USA z prezidentom Donaldom Trumpom zapodało. Po tutym puću je najmócniši gremij UNO prěni króć zhromadny dokument k wójnje wobzamknył. W radźe dósta tekst, w kotrymž Rusku jako agresora njepomjenuja, hłosy dźesać čłonow w 15čłonskej radźe a tak trěbnu wjetšinu. W zwadźe wo nowy kurs napřećo Ukrainje hłosowachu USA mjez druhim zhromadnje z Ruskej a Chinu.
Porno tomu je so wšitkich pjeć europskich čłonow rady, Wulka Britaniska, Francoska, Słowjenska, Danska a Grjekska, hłosa wzdało. Britojo a Francozojo maja drje teoretiske prawo na weto, njejsu pak je wot lěta 1989 wjace wužiwali. Rezolucije Bjezstrašnostneje rady UNO su ludoprawnisce zawjazowace. W rezoluciji žadaja sej spěšne zakónčenje wójny w Ukrainje. Při tym njemjenuja Rusku agresora a nježadaja sej cofnjenje ruskich jednotkow z Ukrainy. Europske kraje tutón formulaciju wotpokazuja.
SPD žada sej přizwolenja Merza
Prěnje posedźenja zapósłancow po wólbach zwjazkoweho sejma
Berlin (dpa/SN). W bližacych so koaliciskich jednanjach wočakuje SPD wot kanclerskeho kandidata CDU/CSU Friedricha Merza najebać toho jasne wólbne dobyće widźomne přizwolenja na dobro socialdemokratow. SPD njeje so nihdy bojała, zamołwitosć za kraj přewzać, rjekny předsyda strony Lars Klingbeil sćelakej ZDF. „Při wšěm wočakujemy, zo Merz swój kurs a wosebje swój ton jasnje změni.“ Tak trjebaja dźěławi lěpše mzdy a wjace pjenjez w móšni. Nimo toho dyrbjeli so renty zawěsćić a miliardy eurow wopřijace inwesticije nastorčić.
Klingbeil potwjerdźi, zo njeje scyła hišće wučinjenje, zo so socialdemokraća na knježerstwje wobdźěla. „Bul leži pola Friedricha Merza. Wón je zamołwity, rozmołwy wjesć“, wón rjekny.
Unija bě wólby jako najsylniša móc dobyła, SPD porno tomu poćerpje historisku poražku. Nětko wupada wšitko za koaliciju CDU a SPD.
