Jara sćerpliwi dyrbjachu šoferojo dźensa na zwjazkowej awtodróze ...
Zastojnicy su předrozy
Berlin (dpa/SN). Zwjazk płaćerjow dawkow je so za to wuprajił, w přichodźe mjenje ludźi do statusa zastojnika přewzać, dokelž su wudawki za to jara wulke. „Za zjawne etaty su kóšty za zastojnikow přeco wulke poćeženje“, wuzběhny prezident organizacije Reiner Holznagel w nowinje Rheinische Post. „Tohodla měł so status zastojnikow přepruwować a z nim zwisowace priwilegije kritisce analyzować. Lěpšiny zastojnikow dźěłaćerjo w swobodnym hospodarstwje wjace njezrozumja. Rozdźěle hladajo na mzdu zastojnikow a mzdu dźěłaćerjow bywaja dale a wjetše.“ Holznagel k tomu namołwja, ličbu nowych zastojnstwow na minimum a jenož na wažne jadrowe wobłuki wobmjezować – to rěka w policiji, financnym zarjedźe a we wobłuku justicy. Tež generalny sekretar CDU Carsten Linnemann bě sej mjenje zastojnikow žadał. „Mi je wažne, zo jenož tam zastojnikow zasadźamy, hdźež so wažne nadawki spjelnjeja. W ministerstwach zastojnicy njejsu trěbni a připódla prajene ani w zjawnym zarjadnistwje“, Linnemann zwurazni.
Prócuja so wo rozrisanje
Wulke wočakowanja na noweho šefa
Berlin (dpa/SN). Šef Němskeje železnicy Richard Lutz dyrbi so swojeho zastojnstwa dočasnje wzdać. 61lětny smě koncern jenož hišće tak dołho nawjedować, doniž njejsu naslědnika namakali, zdźěli wčera zwjazkowy wobchadny minister Patrick Schnieder (CDU). Němska železnica bědźi so hižo dlěje z problemami. Kriza w zawodźe bywa dale a wjetša.
Noweho šefa Němskeje železnicy wočakuja hoberske wužadanja. Syć kolijow je marodna, tež njedypkownosć je wulka tema. Ćahi hustodosć prosće njejězdźa abo su přepjelnjene. Zwjazkowy wobchadny minister chce 22. septembra nowu strategiju za železnicu předstajić, wo kotrejž pak wón dotal lědma što přeradźa. Titul „Agenda za spokojnych kupcow na čarje „ pak hižo přeradźa, wo čo dźe. „Železnica dyrbi dypkowna, wěsta a čista być“, Schnieder wčera wuswětli. „Za to pytamy kmany personal.“
Najrjeńša šćežka Němskeje w Sakskej
Mjenje miliny přetrjebali
Lipsk (dpa/SN). Sakska produkcija bruttomiliny je so w lěće 2023 wo nimale štwórćinu znižiła. Tole wuchadźa z energijoweje bilancy, kotruž je krajny statistiski zarjad wčera wozjewił. Po tym so produkcija miliny na 34 terawattowych hodźin pomjeńši. Podźěl miliny z brunicy je drje najwjetši, ale je wo jědnaće terawattowych hodźin woteběrał. To wotpowěduje třećinje, statistikarjo wuličichu. Rozrostł je w samsnym času podźěl z wobnowjomnych energijow, wosebje wětrnikow a fotowoltaiki. Tu je produkcija miliny wo pjeć terawattowych hodźin přiběrała. To wotpowěduje rozrostej dźewjeć procentow.
Přetrjeba energije w Sakskej je woteběrała. Po statistice přetrjebachu ludźo 2023 cyłkownje 566 petajoulow miliny z płuna, brunicy a mineralneho wolija. To je 13 procentow mjenje. Najwjetši podźěl ma tohorunja miliny z brunicy – přetrjeba je wo nimale třećinu woteběrała. Dale a mjenje miliny přetrjebuje industrija (minus 9 proc.), po tym sćěhuja domjacnosće (minus 7 proc.). Přetrjeba we wobchadnym sektorje wosta z jednym procentom nimale njezměnjena.
Titul so zadani
To a tamne (15.08.25)
Mortwy hołb je w Berlinje-Hellersdorfje wulke zasadźenje policije zawinił. Swědcy su policiju wołali, dokelž běchu wutřěle słyšeli, na čož je mortwy hołb do jich dwora padnył. Bórze so tam wjele zastojnikow nawali a z dowolnosću sudnika so do bydlenja pozdatneho třělca zadobychu. Tam drje municiju za powětrowku namakachu, ale ani brónje abo čłowjeka. Pozdźišo pak wobydler tutoho bydlenja na policajsku staciju přińdźe, zo by sej swój kluč wotewzał. Twjerdźeše, zo je hołbja z katapultom wottřělił. Policija naležnosć nětko přepytuje.
Za tři měsacy so w Němskej sezona hodownych wikow zahaji. Město Drježdźany so hižo za jědlu abo šmrěkom rozhladuje, kiž móhli na wiki stajić. Štom měł něhdźe 23 metrow wysoki a runje zrosćeny być.
Što sej z toho sobu wozmjemy?
Sep mysli po lětušim CSD w Budyšinje
Naš Budyšin je pisany! Jasny to signal, kotryž su zašłu njedźelu tysacy demonstrantkow a demonstrantow wusyłali. Z tym su so trendej w cyłej Němskej přizamkli. W Sakskej na přikład běchu w lěće 2020 runje štyri zarjadowanja pod hesłom CSD. Dźensa, pjeć lět pozdźišo, je jich hižo 20 na lěto. Towaršnosć je wočiwidnje wotewrjeniša, pisaniša, tolerantniša. A třeći CSD w Budyšinje je pokazał, zo zamóže zarjadowanje za prawa queernych samo tysacy ludźi na dróhi městačka wołać. Při tym je demonstracija CSD w Budyšinje pokazała, zo je zarjadowanje wuslědk synergije wjacorych prudow progresiwneje towaršnosće. Tule zjednoćeja so mjenujcy politiske lěwicarske ideale, kaž prawa mjeńšinow, z wojowanjom přećiwo přiběracym prawicarskim strukturam, wosebje na wuchodźe Němskeje. Zarjadowanja, kotrež steja eksemplarisce za wotewrjenu a inkluziwnu towaršnosć, dožiwichu zašłe lěta a dožiwjeja dźensa přiběrajcy tak mj. prawicarski backlash – skutki abo wuprajenja, kotrež so přećiwo zarjadowanjam kaž swjedźenjam pisanosće a podobnym měrja.
Rozprawa rady nětko online
Drježdźany/Budyšin (SN). Štóž chce so z dźěławosću sakskeje serbskeje rady bliže zeznajomić, ma dobru składnosć: Wutoru na wuradźowanju gremija w krajnym sejmje je předsyda rady Dawid Statnik na to skedźbnił, zo je rozprawa rady za dobu 2023/2024 nětko jako ćišćenka parlamenta přistupna. Pod čisłom 3769 wosmeje wólbneje periody móžeće sej ju w dokumentaciji sakskeho sejma wotwołać (zapodajće hesło: edas). Rozprawa we wobjimje dźesać stron so tež w serbšćinje jewi.
W zašłymaj lětomaj je so rada pod nawodom Marka Sucheho 22 króć zešła. Rozprawa informuje wo poručenjach tutoho poradźowaceho gremija a tež wo zhromadnym dźěle z Domowinu, Serbskim sejmom a braniborskej serbskej radu. Gremijej přisłušeše tehdom Chróšćanski wjesnjanosta Marko Kliman. Runja Markej Suchemu wón w aktualnej wólbnej periodźe z čłonom rady njeje. Diana Šołćina a Julian Nyča w njej dale skutkujetaj kaž tež Dawid Statnik. Předsyda Domowiny je zdobom zastojnstwo předsydy serbskeje rady přewzał. Nowaj čłonaj staj Jan Ryćer a Stefan Anders.
