Jako so 2. septembra 1957 do Budyšina prěni dźeń na dźěło podach, LND hišće njeeksistowaše. W domje čo. 23 na Wonkownej Lawskej bě redakcija serbskich wučbnicow zaměstnjena. Wona bě wotnožka Berlinskeho nakładnistwa VWV. Do redakcije serbskich wučbnicow słušeštej tehdy hornjoserbski wotrjad z 50 a delnjoserbski z dźesać přistajenymi.

1. julija 1958 so potom LND załoži. ­Jeho stołpaj běštej wot wšeho spočatka lektorat za rjanu literaturu a lektorat ­za šulske knihi, kaž so naš wotrjad nětko mjenowaše. 1962 smy wot Wonkowneje Lawskeje do něhdyšeje Donnerhakec ­knihićišćernje Před šulerskimi wrotami přećahnyli, dokelž bě so kruh sobudźěłaćerjow wuznamnje pomjeńšił.

„Rjana kniha dawa hłowje inspiraciju – a ruce lubosć.“ Tónle citat z lětnjeho ­programa nakładnistwa Hermanna Schmidta, kotrež naročne typografiske knihi wuwiwa, je mi dźensa hesło a zamołwitosć w powołanju jako wuhotowarka knihow w našim nakładnistwje. Hižo 16 lět w domje dźěłam a wjeselu so kóždy dźeń nad kreatiwnej a wotměnjawej činitosću. Zhromadnje z lektorami wobstejace knižne nakłady dale wjedźemy, druhdy samo dale wuwiwamy a nowe knihi nastać damy.

Dokelž Ludowe nakładnistwo Domowina cyłkowny repertoire na knihach wopřijima, mějach wulke zbožo wudaća w beletristiskim wobłuku, ale tež dźěćace a wěcne knihi, wobrazowe zwjazki a šulske wučbnicy wuhotować – jim wobličo dać. Za tu abo tamnu publikaciju smědźach samo ilustracije rysować. Za wjele dalšich knihow, zwjetša za dźěći, wudźeržuju kontakt k ilustratoram. Zwjetša su to znaći grafikarjo. Zajimawe a přijomne nazhonjenja z nimi su mi w kóždym padźe wobohaćenje w grafiskim žiwjenju.

Jako 6. julija 1947 prěnje čisło „Noweje doby“ wuńdźe, witaše to jeje šefredaktor Měrćin Nowak-Njechorński jako znamjo noweho časa a wopodstatni wólbu mjena nowiny z nowej dobu, kotraž bě so za serbski lud zahajiła. Politiski charakter nowiny w słužbje časa njeje do prašenja stajał. Zo so nowinske tradicije pod mjenom Serbske Nowiny dale njewjedźechu, bě łamk, kotryž je hač do kónca lěta 1990 profil Noweje doby postajał. Nowa doba wuchadźeše wot oktobra 1947 dwójce a wot julija 1948 trójce wob tydźeń, doniž wot 1. oktobra 1955 jako dźenik njewuchadźeše. Spočatnje měješe wona přiłohi, z kotrychž počasu samostatne nowiny wurosćechu, kaž Nowy Casnik, Płomjo a młodźinski časopis Chorhoj měra. Tež powójnske knižne edicije mějachu 1948, lětdźesatk do załoženja knižneho serbskeho nakładnistwa, w Nowej dobje swoje korjenje.

Zazběh mojeho dźěła w LND padnje na wosebity datum: Nastupich tu 1. julija 2003, potajkim dokładnje na dnju 45. narodnin nakładnistwa. A snano je zajimawy připad, zo tuchwilu nad samsnej knihu sydam, kotruž dóstach před 15 lětami jako prěni nadawk na blido. Tehdy je mje Irena Šěrakowa sto stron manuskripta 5. nakłada prawopisneho słownika přehladać dała. Dźensa přihotuju 7. nakład našeho standardneho dikcionara. W swojim powołanju mam, skrótka prajene, wobsah knihi na starosći. Diskutuju z awtorami wo natwarje manuskripta, wo zrozumliwosći argumentacijow, dźiwam na adekwatnu rěč a stil a wězo pomham při wabjenju a prezentowanju hotoweje knihi. Tróšku připadnje dóstach so na tute městno: Na slepe zbožo sym sej do Budyšina dojěł a manuskript přełožka „Pućnika po galaksiji“ Douglasa Adamsa LND poskićił. Takrjec připódla so iniciatiwnje wobhonich, hač nimaja w lektoraće městno za mnje. Runje te­hdy je so jednaćelka Ludmila Budarjowa z myslu nosyła, nowe městno lektoratneho asistenta stworić, zo by nakładnistwo dorostej perspektiwu skićiło.