Aus der aktuellen Ausgabe vom Freitag, 16 Februar 2018

Nadal wulki je zajim za tradicionalnu zymsku wustajeńcu ke kultowemu filmej „Tři worješki za popjelawku“ na Moritzburgskim hrodźe. Na wšě 100 000 wopytowarjow su tam dotal zličili, kaž zarjadnistwo hrodu zdźěla. Nadźijeli běchu so 80 000 hosći. Přehladku z kostimami, rekwizitami a kulisami woblubowaneho bajkoweho filma běchu 18. nowembra 2017 wotewrěli. Wona je hišće hač do 25. februara přistupna.

Zbožo w njezbožu měješe staruška w Brettenje pola Karlsruhe. Ju běchu wobšudnicy wobkradnyli, prošo 79lětnu, jim pjenjezy měnjeć. Při tym torhnychu jej móšničku z 500 eurami z ruki a zminychu so. Pjenjezy bě žona za swoje 80ćiny na bance wotzběhnyła. Hosćo na susodnej póstniskej party spontanje reagowachu, zběrachu za starušku pjenjezy a přepodachu jej dohromady 200 eurow.

Parkland (dpa/SN). Wot policije zaja­ty amo­kowy třělc je šulski masaker w zwjazkowym staće USA Florida při­znał. Tole rozprawja lokalna nowina Sun Sentinel, powołaca so na akty sudnistwa. Kaž sheriff Scott Israel informuje, bě 19lětny Nikolas Cruz z priwatnym taksijom k šuli jěł a tam třěleć započał. Po tym měšeše so mjez ćěkacych šulerjow a móžeše tak twochnyć, bjez toho zo by jeho něchtó spóznał. Po wopyće spěšnohosćenca ­jeho policija zaja. Cruz bě srjedu na swojej bywšej šuli, Majory Stoneman Douglas High School Parkland, 17 ludźi morił. Pjatnaće zranjenych je přeco hišće w chorowni. Někotři z nich su w kritiskim stawje.

Budyšin (SN/bn). Předsyda sakskeho zjednoćenstwa Zwjazka 90/Zelenych Jürgen Kasek je wčera w Budyskim woby­dlerskim běrowje strony, tak mjenowanym Zelenym wobchodźe, na temu prawicarske šćuwanja přednošował. Najprjedy wěnowaše so zasadnym prawniskim prašenjam a je dokładnje rozłožił, hdźe leži hranica mjez legitimnym, přez wustawu Němskeje škitanym swobodnym zwuraznjenjom měnjenja a šćuwanjom, křiwdźenjom a namołwu k namocy.

„Statne rěčnistwo jenož potom zakroči, su-li ranjace wuprajenja jasnje přećiwo zakonjej, na přikład hdyž něchtó konkretnej wosobje dopokazujomnje hrozy abo rani-li zakaz pokazowanja přećiwowustawnych symbolow. Indirektne abo tež začuwane hroženja, byrnjež po wobsahu jasne byli, rěčnistwo njewobdźěłuje. Přiwšěm je wažne kóždy podawk wozjewić – pak policiji pak přez internetnu stronu ‚onlinewache‘ pak direktnje statnemu rěčnistwu“, Kasek wuzběhny.

Pólski ministerski prezident na wopyt w Berlinje dokładnje přihotowany

Waršawa. Pólski ministerski prezident Mateusz Morawiecki je dźensa zwjazkowu kanclerku Angelu Merkel (CDU) w Berlinje wopytał. Planowane běchu rozmołwy wo mjezsobnych politiskich a hospodarskich poćahach. Rozjimać chcychu pak tež dwělomnu justicnu reformu w Pólskej, nowy zakoń wo holocausće a nic naposledk temu ćěkancy.

„Tež rasistiske měnjenje je najprjedy raz wot swobody słowa škitane.“ Tele wuprajenje Jürgena Kaseka pokazuje, kak ćežko je wotwažliwje postupować a rozsudźić, hdy jedna so wo juristiski pad. „Wšitko wozjewić“ namjetuje tuž politikar Zwjazka 90/Zelenych, poćahowacy so na prawicarske šćuwanja. Byrnjež wuhlady chłostanjaprawniskeho razu „anonymity skućićelow dla snadne“ byli a často „zaćišć nastał, zo to ničo njepřinjese“, zańdu wotpowědne pokazki do statistiki. A hižo ryzy mnóstwo pozdatnych kaž tež woprawdźitych přeńdźenjow „statnemu rěčnistwu trěbnosć jednanja wuwědomja“. Wuwědomić pak měli sej tež, zo systematisce prowokowacym předewšěm wo to dźe, strach šěrić a zaćišć budźić, zo su dźěl wjetšiny. Tomu tak njeje, hewak wšak tele linki scyła móžne byli njebychu. Su prosće mała, ale aktiwna horstka. Njedajmy jej wjace ruma, hač je trjeba. Bosćan Nawka

Staw medaljow po 44 ze 102 rozsudow:

złoto slěbro bronza

1. Němska  9 2  4

2. Norwegska   6 8 5

3. Nižozemska  5 5 2

4. USA   5 1 2

5. Kanada  4 5 4

6. Šwedska  4 2 0

7. Francoska  3 2 2

Cyłkownje dźewjatu złotu me­dalju za němsku olympisku wubranku docpěchu spěšnosankowarjo wčera w zakónčacym teamowym wubědźowanju. To rěka, zo su Němcy wuspěch ze Sočija hižo přetrjechili a su najwuspěšniši kraj w sankowarskim wubědźowanju.

Jednotliwcaj Natalie Geisenbergera, Johannes Ludwig kaž tež Tobias Wendl a Tobias Arlt na dwojosydłaku su swojej faworitowej róli wotpowědowali a Němskej dalše olympiske złoto zawěsćili. Slěbro zawěsći sej Kanada. Awstričenjo wobsadźichu třeće městno. Němske mustwo bě teamowe wubědźowanje hižo 2014 w Sočiju dobyło, jako je tam prěni króć přewjedźechu.

Něhdźe 120 připosłucharjow je zawčerawšim na žurli Wojerowskeje Kulturneje fabriki premjeru noweho programa wobydlerskeho chóra „Twarju wam spěw“ dožiwiło. Pod wuměłskim nawodom Andréja Bischofa spěwarjo koncert dźensa w 19 hodź. na samsnym­ městnje wospjetuja. Tež w běhu lěta móžemy jich dožiwić. Foto: Gernot Menzel

Pjatk 16.2. 19:00 „Zymske hwězdy nad Budyšinom“ – zetkanje w Budyskej hwězdarni

Sobotu 17. do 19.2.  185. młodźinski zapust w Hochozy

  10:00 Dźěłarnička z Reginu Herrmann k zhotowjenju ručnych klankow w Budyskim Serbskim muzeju

  12:00 Zapust w Drjejcach

  12:30 Zapust w Popojcach

  13:00 Zapust w Njabožkojcach

  14:00 Zapust w Nowej Niwje

  16:00 Dźěćace kino w Chróšćanskej putniskej hospodźe

  19:30 Premjera inscenacije „Paradiz w dobrej stwě“ na hłownym jewišću NSLDź w Budyšinje

  19:45 Diapřednošk „Putnikować po Španiskej“ w Chróšćanskej putniskej hospodźe

Njedźelu 18.2. 10:00 Wiki „Swjećić w regionje“ na žurli Wojerowskeje lutowarnje

  10:00 Serbsko-němske kemše we Wjerbnje

  10:30 Wodźenje k ličenskej technice we Wojerowskim Zusowym muzeju

  11:00 Njedźela za cyłu swójbu w Kamjenskim Muzeju zapadneje Łužicy

  12:00 Zapust w Škodowje

  13:00 Zapust w Žylowje a Hochozy

  14:00 Zapust w Gołbinje

  14:00 9. symjenjowa burswa w Chrjebi-Nowej Wsy

  16:00 Předstajenje komedije „Kurowa klinika ‚Wjesoła mysl‘“ lajskeje dźiwadłoweje skupiny Šunow­Konjecy pola Bizoldec w Haslowje

  18:00 Pasionski nyšpor w Budyskej Marje-Marćinej cyrkwi – na pišćelach hraje Fabian Kiupel

njedźelu hornjoserbsce

11:00 Łužica tutón tydźeń, mjez druhim wo kulojtym blidźe wo serbskim Budyšinje

11:20 Zyma w serbskej hudźbje

11:45 Serbska premjera NSLDź

12:00 Nabožne wusyłanje

 (Gerat Wornar)

po tym zbožopřeća

delnjoserbsce

12:30 Aktualny magacin, mjez druhim wo „hłownej“ Choćebuskeje Domowinskeje skupiny

13:00 Z hudźbu w rozmołwje:

dr. Fryco Libo

13:30 Nabožne wusyłanje

 (Cyril Pjech)

po tym zbožopřeća

Camprowanje młodźiny dožiwić

Hochoza. Wot jutřišeje soboty hač do póndźele, 19. februara, wotměje so w Hochozy 185. młodźinske camprowanje. Hižo we 8 hodź. budźe młodźina jutře na nohach a zetka so při hosćencu „K złotemu zmijej“. Wottam poda so na puć, zo by dom wot domu wotchodźiła a camprowała. Wječor budu w hosćencu reje. Tež njedźelu připołdnju a póńdźelu Hochoženjo dale swjeća.

Wiesnerec koncertuje

Lipsk. Jutře we 18 hodź. su zajimcy do Lipšćanskeho Schubertoweho domu na 5. tradicionalny wosebity koncert z pianistku Heidemarju Wiesnerec přeprošeni. Zaklinčeć maja twórby serbskich komponistow Hinca Roja, Jana Cyža, Detlefa Kobjele, Ulricha Pogody a Sebastiana Elikowskeho-Winklera.

Na němsko-serbske kemše

Wjerbno. Njedźelu w 10 hodź. swjeća we Wjerbnjanskej cyrkwi serbsko-němske kemše. Dźěłowa skupina Serbska namša wěriwych přeproša.

Nowe modowe trendy