Swjedźeń prěni raz samostatnje
Budyšin (CS/SN). Tójšto lět wotměwaše so Budyski klankodźiwadłowy swjedźeń paralelnje k swjedźenjej Stareje wodarnje. Tón pak Tilo Rosjat po 25 lětach w tej formje hižo organizować nochcyše. Město toho wotměje so přichodny kónc tydźenja nowy staroměšćanski festiwal.
Klankodźiwadźelnik Ekkehart Heute a Stefan Lehmann z Kamjentneho domu, organizatoraj klankodźiwadłoweho swjedźenja, chcyštaj pak jón znowa posledni kónc tydźenja w awgusće přewjesć. Rozsud wopokaza so minjenu sobotu a njedźelu jako prawy. Přetož wopytowarjo přichadźachu kaž zwučene na teren pod Karasekowej wěžu. Wulcy a mali lubowarjo klankodźiwadła móžachu so wot kašpora a jeho přećelow wobkuzłać dać. Hosćićel Ekkehart Heute předstaji znate Budyske powědki w cyle nowym šaće. Wón so wjeseleše, zo klankodźiwadło tež dźensa hišće młodu generaciju fascinuje, byrnjež elektroniska konkurenca wulka była.
„Krjudowana Łužica“
Kóždemu swoju šansu
Chór Budyšin na Čornoboze spěwał
Benedikt Dyrlich: „Běch w NDR a w Serbach bjez šansy“
Budyšin (SN/JaW). „Doma we wućekach 1“ je prěni dźěl noweje knihi basnika, spisowaćela, publicista a žurnalista Benedikta Dyrlicha, kotruž je wčera wječor w Budyskej Smolerjec kniharni zajimowanemu publikumej předstajił.
Lektor Pětr Thiemann wuzběhny publikaciju jako „wosebitu knihu“. Jednaćelka Ludoweho nakładnistwa Domowina, kotrež knihu wuda, Marka Maćijowa dźakowaše so Dyrlichej předewšěm za to, zo „je zmužitosć měł zjawnosć do swojeho žiwjenja hladać dać“. Zdobom zwurazni jednaćelka LND wjeselo nad tym, zo je prěni dźěl awtobiografije po dlěšim času přihota wušoł. Nimo toho móžeše wozjewić, zo předleži nowostka paralelnje tež hižo jako e-book, kotryž móža sej zajimcy kupić a na mobilnych nastrojach abo kompjuteru čitać.
Pokłady časoweje kapsle
Wobsah kule Bukečanskeje cyrkwineje wěže nachwilnje widźeć był
Wot apryla wobnowjeja wěžu Bukečanskeje cyrkwje. Wosebje třěcha trjebaše nuznje nowu koporowu hawbu. Zo móhli ju připrawić, su twarjenje hač do kónca meje dospołnje zaróštowali, stare pokryće kaž tež na wjeršku wěže montowanu kulu a wjertawku wotewzali. Tajka tež knefl mjenowana kula – w Bukecach je to skerje sudźik – je zwjetša zdobom časowa kapsla. Twarcy běchu w zašłosći z toho wuchadźeli, zo je tradicionelnje najwyši dypk wsy resp. města idealny, zachować a składować historiske dokumenty a artefakty. Na te wašnje škitane je zrědka wuhladaš, chibazo jón zaso raz saněruja. Tak mějachu zajimcy lětsa dwaj měsacaj přiležnosć, sej w cyrkwi wustajene potajnstwa kule wobhladać. Bukečanski farar Thomas Haenchen bě wšitko, štož je w njej namakał, rjadował a zjawnosći we witrinach spřistupnił.
Film wo Gundermannje w kinje
W Byrgarskim domje trjebaja lift
Lětni serial SN9. dźěl
Byrgarski dom w Niskej na Mužakowskej je woblubowana adresa tym, kotřiž dobru jědź lubuja, na zajimawe přednoški słuchaja abo so rady směja. Přetož za wšo to maja tam wotpowědne poskitki. Wulka žurla na prěnim poschodźe móža dźělić. Połsta hač do 450 ludźi móžeš w njej derje zaměstnić. W njej wotměwaja kóždolětny bal jěcharjow abo sporta, wotchadnički šulerjow abo karnewal. Tež rejwanska šula tam zarjadowanja přewjeduje. W přizemju wabitej towaršnostnej rumnosći mjeńše skupiny so zetkać. Jedna ma mjeno Sprjewja, dalša Niska, hosćenc rěka Mostowy restawrant a žurla „Łužiska žurla“.
Jubilejny festiwal twjerdeje hudźby z překwapjenku
Nuknica (sw/SN). Lětsa zarjaduje towarstwo Barakka mjeztym hižo 20. Nukstock-openair při Nukničanskej skale. Wot 24. do 26. awgusta wustupi na z přestrjencami wukładźenym jewišću dohromady dźewjeć skupin z tu- a wukraja. Z cyłkom Night Viper ze Šwedskeje, ruskej band Cist a šwicarskim trijom Matterhorn wopytaja prěni raz kapały z tychle krajow łužiski underground-festiwal.
Zjězd brigadow
Wot 19. do 22. awgusta 1948 wotmě so w Delnim Wujězdźe Zjězd dźěłowych brigadow Serbskeje młodźiny (SM). Prěni dźeń bě studentska schadźowanka, na třećim dnju bilancowachu brigady swoje skutkowanje. Wjeršk zlěta bě njedźelu, 22. awgusta. Něhdźe 10 000 ludźi do wsy přichwata. Na čole swjedźenskeho ćaha kročeše brigada „Alojs Andricki“, kotraž bě w Juhosłowjanskej dźěłała. 220 młodych Serbow předstaji masowu rejwansku scenu, z kotrejž běchu na Wšosokołskim zlěće w Praze wustupili. Delni Wujězd dožiwi tež prěnju mjezynarodnu kopańcu w Serbach: Radworska Slawija přewiny mustwo pólskeho konsulata w Złym Komorowje z 2:1. Na Zjězdźe brigadow chcychu zdobom samostatnu organizaciju z mjenom Serbska ludowa młodźina (SLM) załožić. Dźěłowy wuběrk bě šěsćstronski naćisk wustawkow z kandidatnej lisćinu do Drježdźan krajnemu wjednistwu SED pósłał. Wottam, wosebje pak ze sowjetskeje strony załoženje SLM wotpokazachu. Wotpowědny přikaz bě maršal Sokolowski z Berlina-Karlshorsta majorej Kownerej do Budyšina pósłał.
Mikławš Krawc
