Prěnja wustajeńca lětsa w Choćebuskim Serbskim domje pokazuje mólby a grafiki wuměłče Marion Kwicojc. Na wernisaži překwapi wona k tomu jako spěwarka a multiinstrumentalistka.
„Reja do raja“ je hesło prěnjeje lětušeje wustajeńcy w Choćebuskim Serbskim domje, kotruž je kaž přeco Serbska kulturna informacija Lodka organizowała. Něhdźe połsta hosći móžachu na jeje wotewrjenju 25. januara witać.
Tónraz ma serbska molerka, ilustratorka a grafikarka, wot lěta 1997 jako swobodna wuměłča skutkowaca Marion Kwicojc z Lipska móžnosć, swoje wobrazy w Delnjej Łužicy wustajeć. Mjez dwaceći wuměłskimi twórbami – po połojcy mólby a tušowe grafiki – stej dwě hakle njedawno nastatej, kotrejž pokazujetej zapust młodźiny w Běłej Górje.
Budyšin (SN/bn). Spěchowanski kruh za serbsku ludowu kulturu zarjaduje tež lětsa zaso Wubědźowanje wo najrjeńše jutrowne jejko. Hižo 65. raz budźe wěcywustojna njewotwisna jury wukony lajskich wuměłcow mytować, a to w kategorijach wóskowanje, bosěrowanje – w tutymaj segmentomaj spožča myta stajnje dwójce za jedno- a wjacebarbne twórby – kaž tež škrabanje a wužrawanje.
Hišće hač do 16. februara móža dorosćeni zajimcy swoje wudźěłki – jednotliwe eksemplary runje tak kaž kolekcije – w Budyskim Serbskim domje abo w regionalnych běrowach Domowiny resp. Załožby za serbski lud zapodać.
Najrjeńše jutrowne jejka wustaja po tradiciji we wobłuku 27. serbskich jutrownych wikow, kotrež tohorunja spěchowanski kruh za ludowu kulturu 24. a 25. februara w Budyskim Serbskim domje wuhotuje.
Tež wubědźowanje za dźěći a młodostnych – wuraznje su tu tež wučomnicy a studenća namołwjeni so wobdźělić – spěchowanski kruh znowa přewjedźe. Wurisanje wotměje so separatnje a skónči so srjedu po jutrach, 4. apryla.
Berlin (SN/JaW). Zhromadne dźěło mjez mjeńšinowymi nowinami a dalšimi medijemi steješe minjeny pjatk mjez druhim na programje 1. medijoweho foruma Federalistiskeje unije europskich narodnych mjeńšin w Berlinje.
Nimo wjacorych němskorěčnych mjeńšinowych nowin, kaž na přikład w Danskej, Kazachstanje, Pólskej abo Rumunskej, předstaji šefredaktor Serbskich Nowin Janek Wowčer skutkowanje serbskeho wječornika na tym polu. W prezentaciji wustaji wón wažnosć Europskeho zjednoćenstwa nowin w mjeńšinowych a regionalnych rěčach (MIDAS), w kotrymž su mjeńšinowe dźeniki zwjazane, tež Serbske Nowiny. „Z njeho njesměrnje profitujemy. Mamy składnosć wo aktualnych podawkach w europskich mjeńšinach z prěnjeje ruki rozprawjeć, a přisłušne nowiny rozprawjeja tež wo nas Serbach. Nimo toho sej prawidłownje tež nazhonjenja wuměnjamy, štož wšědne dźěło wopłodźa“, Wowčer wuzběhny. Zdobom skedźbni wón na tuchwilne problemy w serbskim žurnalizmje, kaž na přikład na pobrachowacy dorost a na ćeže nastupajo nowe medije z wulkimi nowinami sobu dźeržeć móc.
Budyšin (SN/JaW/bn). Ze zajimawymi diskusijemi wo před tysac lětami podpisanym Budyskim měrje je so wčera dwudnjowska konferenca składnostnje 1 000. róčnicy wujednanja měra zakónčiła. W srjedźišću stejachu předewšěm historiske wobstejnosće kontrakta, zdźěli Budyski Serbski institut (SI), kotryž je konferencu zhromadnje z Lipšćanskim Leibnitzowym institutom za stawizny a kulturu wuchodneje Europy (GWZO) we wobłuku programa „Sharing heritage“ zarjadował. Kaž rjekny přechodny direktor SI Hauke Bartels, móhła konferenca zdobom być „zazběh za nowu kooperaciju z GWZO“.
15 stawiznarjow z Němskeje, Pólskeje a Čěskeje je politiske, towaršnostne a kulturne wuwiće zažneho 11. lětstotka we Łužicy, w Pólskej, Čěskej a romsko-němskim mócnarstwje wobswětliło. „Budyski měr steji dźensa symbolisce za jara wotměnjawe poćahi mjez Němskej a Pólskej. Wón zwobraznja zdobom wosebitu mostowu funkciju dwurěčneje Hornjeje Łužicy, kotruž přicpěwaja jej w pólsko-němskich poćahach mjeztym wjac hač tysac lět“, rěkaše k tomu z SI.
Koparske tabulki
Młodźina D, wokrjesna liga, stafla 2
čoło tabulki
1. Zeleno-běli Sepicy 10 63:11 30
2. SZ Porchow II 9 44:13 21
3. Arnsdorfske KT FV 9 59:18 19
4. TSV Wachau 10 42:29 17
5. Drohotka Ramnow 10 33:23 17
6. SV Liegau-Augustusbad 10 21:33 13
młodźina D, wokrjesna liga, stafla 3
1. HZ Rakecy/Njeswačidło 10 67:26 27
2. HZ Němske Pazlicy 10 77:20 24
3. HZ Lubuš/Bluń 10 62:22 24
4. HZ Łaz/Běły Chołmc 10 72:36 24
5. Hlinowski SC 10 38:30 17
6. SJ Njebjelčicy 10 39:51 13
7. SJ Chrósćicy 10 33:43 9
8. HZ Njedźichow 10 25:56 7
9. HZ Hlinowc/Halštrow 10 16:76 1
10. Sokoł Ralbicy/Hórki 10 17:86 1
młodźina, E wokrjesna wyša liga
1. SV Liegau-Augustusbad 10 87:18 28
2. Jednota Kamjenc 10 67:29 21
3. ST Horni kraj-Sprjewja 9 62:41 19
4. TSV Wachau 10 76:36 18
5. Zeleno-běli Bukecy 10 86:33 16
6. Biskopičanske KT 9 40:37 16
7. Wojerowski FC 10 39:57 9
8. Budissa Budyšin 10 24:76 9
9. Rakečanske KT 10 26:73 7
10. ST Porchow 10 21:128 0