K zazběhej noweho lěta zaklinči we wobłuku „wosebitych koncertow“ komorna hudźba mjez druhim w Choćebuzu, Budyšinje a Wojerecach. Wotměnjawy program saha wot baroka hač do dźensnišeho časa a wopřijima zdobom štyri prapremjery serbskich komponistow. Wěnowany je hudźbny rjad lětsa Klětnjanej Hincej Rojej.
Budyšin (SN/bn). Mjeztym hižo 22 lět organizuje pianistka Heidemarja Wiesnerec rjad „Wosebity koncert k nowemu lětu“. Tón sta so minjene lěta z kruće etablěrowanym a woblubowanym kulturnym wjerškom we a za mjezami Łužicy. W srjedźišću steji wot 5. januara pod hesłom „ROY 90!“ serbski komponist Hinc Roj, kiž swjećeše loni w decembru dźewjećdźesaćiny. Jeho najnowše „Nócne modlenčko opus 185“ zaklinči w tymle wobłuku prěni raz.
Radwor (SN/bn). „Trio a kumple“ bě hesło koncerta, kotryž přiwabi minjenu sobotu něhdźe 200 zajimcow do Radworskeje „Meje“. Kapała Sorbian Art Trio bě jón organizowała a sej wjacorych přećelow přeprosyła.
Dypkownje w 21.37 hodź. band SerBeat wječor zahaji. Njetraješe ani dźesać mjeńšin a tójšto porikow na žurli rejwaše. Měšeńca znatych ludowych spěwow, šlagrow a mjezynarodnych titulow wukopa so wospjet jako zaruka dobreje nalady, najlěpši wothłós wšak žnějachu hudźbicy z pěsnju „Z tobu“, hitom skupiny Wusmuž.
Nowe lěto hišće před durjemi steji, a hižo směm nowe wudaće Rozhlada připowědźić. Zawěsće su sej w decembrje mnozy z was třidźělnu serbsku wersiju dokudramy wo Słowjanach we Wuhladku wobhladali. Lubina Malinkowa poby hižo w nowembrje na předpremjerje němskeho filma a podawa w recensiji swoje mysle wo nim. Jutře w 17.10 hodź. jón telewizija Arte pokaza a tak maće nětko składnosć, wobě wersiji přirunować.
Instanca, kotraž dawa telewizijnym sćelakam feedback wo tym, kak su so wusyłanja radźili, je telewizijna rada. Wot lońšeho ma telewizijna rada sćelaka ZDF 16 zastupjerjow towaršnostnych skupin, na přikład za wobłuk „čestnohamtski ciwilny škit a škit přećiwo katastrofam“ (pomjenowany wot Sakskeje) abo „seniorojo, swójby, žony a młodźina“ (pomjenowany wot Braniborskeje). Jedna ze zastupjerkow je friziska žurnalistka Karin Haug, kotraž je wot Schleswigsko-Holsteinskeje za wobłuk „regionalne a mjeńšinowe rěče“ do rady powołana. W interviewje rozkładuje wona nadawki rady, wopisuje móžnosće, wliw wukonjeć a namołwja naposledk tež, jej zdźělić, je-li so něšto nimokuliło.
Z wustajeńcomaj „Pjeć lětstotkow – Serbja a reformacija“ a „Krabat – Muž – Mytos – Marka“ je Budyski Serbski muzej lětsa wopytowarjam něšto wosebite poskićił. Najwjace zajimcow pak přiwabi přehladka we wukraju.
Róžant (CRM/SN). Kaž kóžde lěto składnostnje hodowneho nyšpora z chórom Lipa, běše tež wčera wječor Róžeńčanski Boži dom hač na poslednje městno wobsadźeny. Chór Lipa ze swojej dirigentku Jadwigu Kaulfürstowej ma dźě tež nastupajo tónle hodowny koncert jara dobre mjeno. Sep znatych a woblubowanych serbskich pěsnjow w swětle swěčkow w swjatnicy dožiwić, to hrěje připosłucharjam wutrobu a wokřewja dušu.
W zwučenej spěwnej kwaliće zaklinčachu tak dźěle z oratorija „Zyma“ Handrija Zejlerja a Korle Awgusta Kocora. Chórisća poskićichu wobkuzłace a zdobom wužadace sadźby Bjarnata Krawca na teksty Michała Nawki a Józefa Nowaka. K tomu předčita Katka Baierowa zeserbšćenu powědku Astrid Lindgren „Dobry wječor, knježe prošerjo“. A pokaza z nim na přećiwk mjez dźensnišim našim wašnjom zromantizowanja a komercionalizowanja hodowneho swjedźenja a jeho poprawneho zmysła.
Mnozy wopytowarjo kóždolětnje sobotu do 3. adwentna w Budyskej Michałskej cyrkwi přewjedźeneho adwentneho koncerta 1. serbskeje kulturneje brigady bychu zawěsće něšto parowali, njeby-li na kóncu kaž rozžohnowanje hač k přichodnemu tajkemu twórba „Knjezowy jandźel“ zaklinčała. Mjeztym jara woblubowanu a daloko rozšěrjenu mištersku kompoziciju je rodźeny Budyšan a dźensa w Drježdźanach jako profesor za kompoziciju skutkowacy Günter Schwarze spisał. „Knjezowy jandźel“ wšak njeje wězo dawno jenička přičina, zo je tele zarjadowanje stajnje jara derje wopytane. Wone je skerje zetkanišćo starych a nowych přećelow serbskeho gymnazialneho chóra. Ćěleso přetrjechi w dalokej měrje niwow někotrehožkuli šulskeho chóra. Jako adwentny koncert připowědźene je zarjadowanje pod nawodom Budyskeho cyrkwinskeho hudźbneho direktora Friedemanna Böhmy stajnje woprawdźe na adwent jako čas přihota na hody wusměrjene.
Nowosć w repertoiru: Serbska adwentna kantata
Serbski ludowy ansambl njehlada jenož z nowej intendantku-dirigentku Judith Kubicec optimistisce do noweho lěta, ale móže tež z lětušej bilancu spokojom dosć być.
Budyšin (SN/CoR). Něhdźe 39 000 přihladowarjow dožiwi lětsa programy Serbskeho ludoweho ansambla. Je to 5 000 ludźi wjace hač minjene lěto. Stopnjowali su ansamblowcy tež ličbu předstajenjow porno lońšemu wo 34 na dohromady 175 předstajenjow. Mjez nimi bě 21 premjerow a nowoinscenowanych programow. Na 21 předstajenjach pokaza so SLA jako pósłanc Serbow w starych zwjazkowych krajach Němskeje kaž tež w Šwicarskej a Awstriskej.