Drježdźany (SN/BŠe). Kónčna rozprawa brunicoweje komisije je tuchwilu wšo postajaca tema. Wčera wječor wěnowaše so tomu tež sćelak MDR we wusyłanju extra, kotrež je w mediatece přistupne. Kotre sćěhi maja namjety komisije za potrjechenych pokazachu na přikładźe wsy Miłoraz. Hižo lěta nimaja wěstotu hač budźe wjes wotbagrowana. Mjeztym zo chce wobydler Günter Zech na swojim statoku wostać, wupraji so Sten Kowalik za přesydlenje. Koncept koncerna Łužiska energija a milinarnje LEAG předwidźi, hač do lěta 2045 brunicu wudobywać. Komisija je datum zakónčenja brunicoweho zmilinjenja hač do lěta 2038 namjeto­wała. Što tole za Miłoraz woznamjenja znowa jasne njeje. Wobydlerjo žadaja sej spěšne a spušćomne wuprajenja.

Přinošk MDR zdobom dopokazuje, zo wuprajenja rěčnika za hospodarstwo frakcije SPD w sakskim krajnym sejmje Thomasa Bauma njepřitrjechja. Wón bě wčera w aktualnej debaće twjerdźił, zo su sej wobydlerjo Miłoraza nastupajo přesydlenje přezjedni. Zapósłanc Lěwicy w sakskim krajnym sejmje Hajko Kozel bě tole raznje wotpokazał.

Při zachodźe do twarjenja Serbskeho instituta na Budyskej Dwórnišćowej su wčera nowu informacisku taflu připrawili. Na njej podawaja wotewrjenske časy Serbskeje centralneje biblioteki a Serbskeho kulturneho archiwa w serbskej a němskej rěči kaž tež za hubjenje widźacych w Braillowym pismje. Tež w domje samym polěkuja nowe informaciske tafličkli lěpšej orientaciji. Naprawu je krajne knježerstwo we wobłuku loni zahajeneje inkluziskeje akcije w zjawnych twarjenjach Sakskeje spěchowało. Serbski institut je prěnja serbska institucija, kotraž bě so wo tajke taflički prócowała a je je nětko připrawić dała. Zdobom maja tam přizjewjensku připrawu za wopytowarjow w koleskatym stole. Foto: Jan Kral

..., nowa powěsć ha, ha, ha, štó ju přinoša?“ Nó, Praženjo! Tam su lětsa ptači kwas woswjećili. Bjezdwěla njebě to tajki, kaž jón we Łužicy znajemy. Přiwšěm nawjazuja přećeljo Serbow w čěskej stolicy ze swojim zaměrom na łužiskoserbske tradicije. Kajka to překwapjenka Praskim a tudyšim ptačim kwasarjam. Z přinoška Radeka Čermáka wuchadźa, zo namaka zajimc w čěskich spěwnikach wjacore ptačokwasne pěsnje. Mjeztym bu jedna serbska samo přełožena, a čěske dźěći su ju nětko spěwali. Snano móhł so nałožk ptačeho kwasa bórze po wšej zemi rozpřestrěć. Štó móhł powěsć šěrić? Myslu na wobdźělnikow lěćneho kursa serbšćiny. Ći dźě pochadźeja z mnohich krajow a zhonja tu wo serbskim nałožku. Čehodla njeměli woni ideju ptačeho kwasowanja swojim ludźom dale dawać? Awtor dźensnišeho přinoška Radek Čermák wšak je něhdy tež wobdźělnik tajkeho lěćneho kursa był. Milenka Rječcyna

Praha (RČ/SN). Slědźo w čěskich dźěćacych spěwnikach namaka zajimc hdys a hdys tež spěw wo ptačim kwasu, hdźež hinaše ptački hač w Serbach nošnu rólu hraja. To je na přikład drózna jako nawoženja. W lěće 2007 hižo bě Praske Towarstwo přećelow Serbow (SPL) w Klubje słowakskeje kultury ptačokwasny wječork zarjado­wało. Mjeztym je hižo tradicija, zo SPL w Praze wospjet wo ptačim kwasu w Serbach informuje. Kóžde lěto pisaja w Čěsko-serbskim wěstniku tež wo krasnych ptačokwasnych ćahach. Zora Beráková a Zuzana Bláhová stej spěw „Hlejće nowa wěc so stała“ njedawno do čěšćiny přełožiłoj. Mjeztym je znate, zo bě před lětdźesatkami w praskim dźělu Satalicach pod wjednistwo Bohumile Šretroveje a Jarmile Škochowe skutkował dźěćacy kružk, wusměrjeny na serbsku kulturu. Na tule tradiciju nawjazuje SPL z wobradźenjom na swjateho Mikławša,­ dźěćacymi popołdnjemi a nětko tež z ptačokwasnej dźěłarničku.