Tajkich ludźi tu njeje!
To a tamne (13.05.22)
Koparskeje hry dla kwasy wotprajili su w Frankfurće nad Mohanom. Přičina je kónčna hra w Europa-League mjez mustwomaj Eintracht Frankfurt a Glasgow Rangers přichodnu srjedu. W padźe dobyća Frankfurtskich liča wot připołdnja přichodneho štwórtka z wulkim nawalom wyskacych fanow před radnicu města. Z tysacami fanow před kwasnej žurlu „njemóžemy dostojnu atmosferu zaručić, kotruž wšitcy na kwasu wočakuja“, město zdźěla. Finale je w španiskim Sevilla.
Swójbu kołpjow z awtodróhi A71 přewodźała je policija w Durinskej. Wjacori šoferojo awtow běchu staršeju z pjeć młodźatami njedaloko Erfurta wuhladali a policiju informowali. Wobsadka policajskeho awta městno zawěsći, zo njebychu kołpje wohrožene byli. Zhromadnje z přiwołanymi wohnjowymi wobornikami swójbu ze strašneje kónčiny wjedźechu.
Nuznje trěbne mosty k wuchodnej Europje twarić
Rozmołwa z Ukrainjanku Yuliyu Komarynets z Lipska
Yuliya Komarynets pochadźa z Ukrainy a je w starobje sydom lět do Němskeje přišła. Po złoženju matury na Choćebuskej šuli „Theodor Fontane“ w lěće 2015 poda so wona na studij slawistiki do Lipska. Tu wěnuje so mjeztym 27 lětna runje swojemu masterskemu dźěłu – za nje bě mjez druhim tež w Kijewskich bibliotekach slědźiła. Připódla dźěła Yuliya Komarynets w duchownowědomostnym centrumje wuchodneje Europy (GWZO) a skutkuje jako přełožowarka za ukrainšćinu a rušćinu. Jan Bogusz je so z młodej wědomostnicu rozmołwjał.
Z kotreho dźěla Ukrainy pochadźeš dokładnje a kak so twojim swójbnym a přećelam na městnje wjedźe?
Finska chce hnydom do NATO
Helsinki (dpa/SN). Finski prezident Sauli Niinistö a ministerska prezidentka Sanna Marin staj so za „hnydomny“ přistup kraja k NATO wuprajiłoj. W zhromadnej deklaraciji witaštaj dźensa čłonstwo w zapadnym wojerskim zwjazku. To by wěstotu Finskeje a cyłeje aliancy zesylniło, rjeknyštaj w Helsinkach. Oficialnu próstwu wo přistup wočakuja kónc tydźenja w Brüsselu. Finska ma 1 300 kilometrow dołhu mjezu k Ruskej.
Njespokojom z ministerku
Berlin (dpa/SN). Městopředsyda frakcije CDU/CSU Johann Wadephul je njespokojom z reakciju zakitowanskeje ministerki Christine Lambrecht (SPD) hladajo na wumjetowanja, zo je swojeho syna w knježerstwowym helikopteru sobu wzała. Lambrecht „ze swojej zdźeržliwej reakciju pokazuje, zo jej trěbne zrozumjenje za zastojnstwo pobrachuje“, rjekny politikar CDU nowinarjam. Ministerka dyrbjała nětko wšitko transparentnje wotkryć.
Žada sej mzdu za hladacych
Woheń na juhu zwjazkoweho stata USA Kaliforniskeje je wjacore domy ...
Scholz a Zelenskyj rěčałoj
Berlin/Kijew (dpa/SN). Zwjazkowy kancler Olaf Scholz (SPD) je wčera znowa z ukrainskim prezidentom Wolodymyrom Zelenskim rěčał. Kaž rěčnik knježerstwa Steffen Hebestreit zdźěli, je so Scholz wo jednanjach mjez Ukrainu a Ruskej nastupajo skónčenje wójny a wo aktualnym połoženju informował. Při tym je Scholz hišće raz na to pokazał, zo wostanje Ruska namołwjena, wšitke wojerske aktiwity w Ukrainje hnydom skónčić, swoje wojerske jednotki z Ukrainy cofnyć a suwerenitu Ukrainy zaručić. Wobaj politikarjej staj w rozmołwje „cyle konkretne praktiske móžnosće dalšeje podpěry Ukrainy“ wobrěčałoj a so dojednałoj, zo wostanjetaj dale we wuskim zwisku.
Zelenskyj po rozmołwje twitterowaše, zo je ze Scholzom wo defensiwnej pomocy, kooperaciji na energetiskim polu a wo sankcijach přećiwo Ruskej rěčał a chwaleše dialog mjez krajomaj.
Ministrojo G7 wuradźuja
Ruska z ofensiwu pokročuje
Kijew (dpa/SN). Ruske wojerske jednotki su po ukrainskich informacijach swoje nadpady na wuchodźe kraja zesylnili a su při tym w kónčinje Donbasa dalši teritorij zdobyli. „Njepřećel ze swojej ofensiwu na wuchodźe pokročuje ze zaměrom, dospołnu kontrolu nad regionami Donjeck, Luhansk a Cherson zdobyć“, zdźěla ukrainski generalny stab dźensa w swojej rozprawje wo połoženju.
Ruske ataki w Donbasu měrja so po tym na města Sjewjerodonjeck, Liman, Bachut, Awdijiwka a Kurachowe a na wot ruskich jednotkow hižo zdźěla wobsadźene Rubišne. Ukrainske wojerske nawodnistwo přizna, zo maja ruske jednotki při tym „zdźěla wuspěch“.
Na frontowym wotrězku Slowjansk, jednym z najwažnišich cilow ruskich ofensiwnych prócowanjow, Moskwa tuchwilu swoje mocy zesylnja. W přihotach nowych nadpadow su tam pječa něhdźe 300 nowych wojerskich jězdźidłow koncentrowali. Nimale njezměnjene je połoženje porno tomu w Mariupolu. Tamnišu woclownju Ruska dale wobtřěla.
Wodźik ma płun narunać
Energijowi zastaraćeljo planuja projekty – zastaranje tuchwilu zaručene
Kamjenica (dpa/SN). Wuchodoněmski energijowy zastaraćel EnviaM chce přichodne lěta zemski płun z wodźikom narunać a njewotwisnosć wot wukrajneho zemskeho płuna powjetšić. W prěnjej kročeli maja w Bitterfeldźe, Roitzschu a Thalheimje w Saksko-Anhaltskej tři připrawy za produkciju zeleneho wodźika nastać, rjekny šef předsydstwa Stephan Lowis wčera w Kamjenicy. Z tym chcedźa woteběraćelow z wulkej energijowej přetrjebu předewšěm w Lipšćanskej kónčinje zastarać. „Přicpěwamy sej, potrjebu zemskeho płuna awtotwarcow Porsche a BMW kaž tež Lipšćanskeho lětanišća narunać.“ Tak mjenowany wodźikowy móst chcedźa z partnerami w třoch abo štyrjoch lětach zwoprawdźić.
„Chcemy płun z wodźikom wuměnić, a to dospołnje“, Lowis potwjerdźi. Při tym chcył EnviaM sam wodźik produkować a wotpowědne kapacity za elektrolyzu natwarić. Něhdźe 7 000 kilometrow dołha syć płunowodow so tež za wodźik hodźi.
To a tamne (12.05.22)
Sornu z kanala wuchowała je wohnjowa wobora w Augsburgu. Kedźbliwi pěšcy běchu zwěrjo na paralelnje wjeducej dróze něhdźe dwaj kilometraj na kolesu přewodźeli a wobornikow běžnje wo tym informowali, hdźe runje su, powołanska wohnjowa wobora zdźěla. Na kromje lěsneje kupjele, do kotrejež so kanal wuliwa, móžeše wohnjowy wobornik zranjenu sornu skónčnje z wody wućahnyć a skótnemu lěkarjej přepodać.
Z Kölna hač do Hamburga běžał je ćeknjeny psyk, doniž jeho skónčnje njepopadnychu. Wobydlerka w Hamburgu-Hausbruchu bě policiju informowała, po tym zo bě w socialnych medijach wo zhubjenym zwěrjeću zhoniła. Zastojnicy psa popadnychu, kiž skutkowaše na nich „derje kormjeny a čiły“ a přepodachu jeho zwěrjatowni, kotraž wobsedźerja wuslědźi. Psyk bě so 15. februara zminył.
