Kijew (dpa/SN). Ukrainski prezident Wolodymyr Zelenskyj je zdźělił, zo so w přistawnym Mariupolu dale ruskej inwaziji spjećuja, „najebać wšo, štož okupanća wo njej rjeknu“. Ruski prezident Wladimir Putin bě wčera twjerdźił, zo je Mariupol zdobyty. Při wšěm je hišće něhdźe 2 000 ukrainskich wojowarjow w tamnišej woclowni. Woni dotal wšitke namołwy Ruskeje, so podać, ignoruja. Putin je wukazał, areal dospołnje zaraćić, zo njemóhła z njeho „ani mucha twochnyć“.

Po informacijach poradźowarki ukrainskeho prezidentskeho běrowa su ruske jednotki w běhu 24 hodźin na wšě 42 wsow w regionje Donjecka na wu­chodźe Ukrainy wobsadźili. Cyłkownje kontroluje ruske wójsko wjace hač 3 500 sydlišćow, zdźěli Olena Simonenko minjenu nóc w ukrainskej telewiziji.

We wsy Manhušu njedaloko Mariupola su ruscy wojacy po ukrainskich informacijach tysacy wobydlerjow w masowych rowach zahrjebali.

Berlin (dpa/SN). Předsyda SPD Lars Klingbeil je zwjazkoweho kanclera Olafa Scholza (SPD) přećiwo wumjetowanjam zakitował, zo je w prašenju dodawanja bróni Ukrainje přestrachoćiwy. Klingbeil sej chwali, zo Scholz w tutym prašenju dokładnje wotwažuje a so z mjezynarodnymi partnerami dorěči. Scholza běchu tež z rjadow amploweje koalicije toho wahanja dla wospjet kritizowali.

Lipsk (dpa/SN). Wójna w Ukrainje ratarjow a politikarjow na wčera zahajenej ratarskej přehladce Agra 2022 zaběra. „Pytnjemy, zo dyrbimy so na krizy přihotować, zo je zaručenje zežiwjenja dźeń a wažniše a zo dyrbimy swoju wotwisnosć na přikład wot surowiznow z Ruskeje wottwarić“, rjekny sakski ratarski minister Wolfram Günther (Zeleni). Wuskutki wójny su mnohostronske a sahaja wot wyšich płaćiznow za hnojidła hač k problemam w logistice, dokelž přińdźe wjele šoferow nakładnych awtow z Ukrainy.

Tež statny sekretar w durinskim ratarskim ministerstwje Torsten Weil warnowaše před wuskutkami wójny a chwaleše zdobom sylnosć ratarstwa za čas koronapandemije: „Minjenej lěće je nas ratarstwo stabilnje ze žiwidłami zastarać móhło.“ Problemy kaž nuzowe hladanje dźěći ratarjow abo prašenje sezonowych dźěłowych mocow su derje rozrisali. Zwjazki ratarjow přiwšěm před wulkimi wočakowanjemi warnuja. Nic jenož płaćizny wuhlady zaćěmnjeja, tež wjedro hraje wažnu rólu: Tuchwilu je w srjedźnej Němskej přesucho. Njeje jasne, kak so žně lětsa wuwija.

Drježdźany (SN). Sakska přiměri prawi­dła za karantenu aktualnemu wuwiću pandemije. Tak móža z koronawirusom inficěrowani wot 25. apryla hižo po pjeć dnjach karantenu zakónčić, nimaja-li 48 hodźin žane symptomy. Njeje hižo trěbne, so potom testować dać. Jeli na pjatym dnju hišće symptomy maja, so karantena wotpowědnje podlěši, maksimalnje pak na dźesać dnjow. Raznje doporučeja, zo potrjecheni najblišich kontaktowych wosobow sami informuja. Za wšitke kontaktne wosoby wotpadnje karantena wot 25. apryla dospołnje. Hač dotal płaćeše to wuwzaćnje jenož za šćěpjenych a wustrowjenych ludźi. Wšitke bliše kontaktowe wosoby – předewšěm přisłušnicy domjacnosće – su dale namołwjeni, škitne naprawy přećiwo infekciji dodźeržeć. To rěka, tak derje kaž móžno kontakty redukować, na symptomy dźiwać a so testować dać. Ludźi, kotřiž w hladanju abo medicinskich institucijach dźěłaja, su dale winowaći, na kóncu karanteny negatiwny test předpołožić.