Drježdźany (dpa/SN). Sakska chce ćeknjenym młodym Ukrainjanam dobre šulske kubłanje poskićić a spušća so při tym na pomoc maćernorěčnych wučerjow. Dotal su 599 dźěći a młodostnych do šulow zapokazali a 1 623 na njedawno aktiwizowanym internetnym portalu přizjewili. To je kultusowy minister Christian Piwarz (CDU) štwórtk w Drježdźanach zdźělił. Połoženje je wokomiknje pod kontrolu, „dyrbjeli-li ličby dale přiběrać, dyrbimy wěcy přestajić a snano tež bóle improwizować“, wón rjekny.

Najwjetši dźěl ukrainskich dźěći chodźi do w času ćěkanskeje krizy 2015/16 zarjadowanych přihotowanskich rjadownjow zakładnych a wyšich šulow, hdźež nawuknu němčinu jako druhu rěč a hdźež jich maćernorěčnje kubłuja – ze stron za to přistajenych wučerjow abo internetnje. W Drježdźanach a Lipsku planuja mjeztym ryzy ukrainske přihotowanske rjadownje, Piwarz rjekny. 45 dźěći a młodostnych z wuběrnym kubłanjom, kotřiž rěča jendźelsce, su do gymnazijow pósłali.

Köln (dpa/SN). Po nimale dwěmaj lětomaj je winowatosć nahubniki we wobchodach wužiwać, zběhnjena. Wobchody smědźa po februaru 2020 zaso kupcow witać, kotřiž nahubnik njewužiwaja. Minjeny pjatk bě winowatosć hižo w Berlinje wotpadnyła. Jenož Hamburg a Mecklenburgsko-Předpomorska z tak mjenowanym ćežišćowym rjadowanjom dale na wužiwanju nahubnika wobstejitej. W drobnym wikowanju wobhladuja kónc nahubnika z měšanymi začućemi. Dźěłarnistwo ver.di rozprawja hladajo na strach natyknjenja wo wobmyslenjach mjez přistajenymi. Tež mjez dźěłodawarjemi jewi so kritika. Při naprašowanju zwjazka bayerskich wikowarjow mjez wobchodnikami zwěsćichu, zo ma 50,4 procenty wikowarjow kónc nahubnika za wopačnu kročel. 39,2 procentaj rozsud witaja. 11,7 procentow drobnych wikowarjow chce kupcow dale prosyć, nahubnik wužiwać. Porno tomu wulke přede­wzaća kaž Rewe, Lidl, Aldi a Edeka připowědźa, zo njetrjebaja kupcy we wobchodach žadyn nahubnik wjace.

Wobrazy z ukrainskeho města Buča su surowy wjeršk eskalacije konflikta na wuchodźe Europy. Pjeć tydźenjow je w měsće blisko Kijewa ruske wójsko brutalnje zachadźało. Mjeztym je so ruske wójsko wróćo sćahnyło. Wčera wozjewjene wobrazy nas zatraša a zmotaja. Ćěła leža wosrjedź dróhow, bydlenja a domy su dospołnje zničene a swědcy wo surowych nadpadach a grawoćiwych přesahnjenjach rozprawjeja. A što čini Ruska? Tamniše knježerstwo ma wobrazy za inscenaciju Ukrainy. Zełžanosć Ruskeje nima hižo žaneje hranicy. Cynizm, kotryž so nadźijomnje pochłosta! Haj, wójna je stajnje surowa, při čimž wjele ludźi ćerpi a zemrěje. Dokumentacija wobrazow w Buči pak pokazaja ludomordarstwo a systematiski teror přećiwo ciwilnej towaršnosći. Ćim bóle měli nětko ze wšitkimi nam k dispoziciji stejacymi srědkami wo to wojować, zo so wójna w Ukrainje zakónči a zo so zamołwići pochłostaja.

Bianka Šeferowa

61lětny muž je so w sakskich šćěpjenskich centrumach na wšě 87 króć přećiwo koronawirusej šćěpić dał. Sobudźěłaćerjam Němskeho čerwjeneho křiža bě muž w jednym z Drježdźanskich šćěpjenskich centrumow napadnył. Policija je jeho mjeztym zajała. Muž bě so stajnje z nowym šćěpjenskim wupokazom přizjewił. Po šćěpjenju wón wonkownu stronu dokumenta ze swojim mjenom z nowej stronu wuměni a wupokaz předa.

15lětny młodostny je so w Posaarskej za wodźidło transportera sydnył a zhromadnje z towaršom k fastfood-hosćencej jěł. Takle zastaranaj podaštaj so na jězbu po awtodróze. Do toho pak młody muž druhemu šoferej napadny, jako jemu w jednosměrowej dróze napřećiwo přijědźe. Policija jeju zadźerža. Kak běštaj wobydlerjej domu socialneje pomocy ke klučikam transportera přišłoj, njewedźa.